Tótenshe jaǵdaılar jónindegi departamenttiń «112 qyzmeti» qala turǵyndaryna osyndaı habarlama taratty
Jaz aıynyń alǵashqy kúninen toqtaýsyz jaýyp, tópelep urǵan nóserden ábdan zárezap bolǵan almatylyqtar sońǵy bir-eki aptada kúnniń shýaǵyna shomylyp, sý burqaqtardy jaǵalap, kúnge qyzdyrynyp, jadyrap qalǵan. Keshe tús aýa «112»-den túsken Almaty ózenderiniń tasýy men daýyl turý qaýpi bar degen habar qala turǵyndarynyń jadyraǵan kóńilin sý sepkendeı basty. О́ıtkeni, sońǵy kezde «Qazgıdromet» ortalyǵy da qatelespeıdi ári aıtqany aıdaı dál keletin bolyp aldy.
Alataýdy aýyr bulttar tumshalaǵany sol-aq eken, aýa raıyn boljaýshylar bul jaýynnyń Almatyda apta boıy sirkireıtinin jáne eskertti. Qalany qaq jaryp aǵatyn Úlken Almaty, Kishi Almaty jáne Esentaı ózenderiniń sýy birden qara qoshqyldanyp aǵa bastady. TJD qala mańyndaǵy ózenderdiń tasyp sel júretindigi týraly eskertýi de turǵyndardy saqtandyryp otyr.
Halyq osydan bir jyl burynǵy Naýryzbaı aýdanynda dál osy maýsymda sel júrgenin de umytqan joq. Qalaı degende de tabıǵattyń tosyn minezine qarsy turýǵa almatylyqtar da, TJD men qutqarýshylar da beıimdelip aldy, tabıǵattyń tosyn qubylysyna tótep berýge árkezde de daıyn. Qajetti tehnıka saqadaı-saı ázir.
Bir qýanarlyǵy buǵan deıin Almaty qalasynyń aryq-atyzdarynyń barlyǵy derlik kúl-qoqystan tazalanyp úlgergen. Barlyq kósheni boılap syldyrap aqqan taý ózenderiniń taram-taram bólinip aryq qýalap aqqan aǵyn sýyna kedergi de, tosqaýyl da joq...
Talǵat SÚIINBAI,
«Egemen Qazaqstan»
ALMATY