Almaty qalalyq halyqty jumyspen qamtý ortalyǵy «Jumyspen qamtýdyń jol kartasy-2020» memlekettik baǵdarlamasyn júzege asyrý aıasynda jergilikti jáne qalaǵa ózge aımaqtardan keletin otandastarymyzdy eńbekke tartý máselesimen tııanaqty aınalysyp otyrǵan mekeme.
Atalmysh memlekettik baǵdarlama boıynsha belgilengen 3 baǵyttyń qala jaǵdaıyna ońtaıly 2 baǵytyna saı mindettelgen tapsyrma ýaqtyly oryndalýda. Aıtalyq, birinshi – «Infraqurylym men turǵyn úı-kommýnaldyq sharýashylyqty damytý esebinen jumyspen qamtýdy qamtamasyz etý» baǵyty boıynsha Almaty qalasyna júktelgen 122 mıllıard teńgeni quraıtyn 286 jobaǵa 11 151 adamdy jumyspen qamtamasyz etý josparlansa, sonyń ishinde «Jumyspen qamtýdyń jol kartasy-2020» baǵdarlamasy aıasynda 29 joba, «Bıznestiń jol kartasy-2020» boıynsha 5 joba, «Nurly Jol» baǵdarlamasy boıynsha – 11, údemeli ındýstrııalyq-ınnovasııalyq damý baǵdarlamasy boıynsha – 4, aımaqtyq damý baǵdarlamasy boıynsha 3 jáne basqa da damý josparlaryna saı 234 joba bar.
Jyl basynan beri qalalyq halyqty jumyspen qamtý ortalyǵy arqyly búgingi tańda «Nurly Jol» baǵdarlamasyna – 163 adam, «Jumyspen qamtýdyń jol kartasy-2020» baǵdarlamasyna saı 135 jáne basqa da jobalar arqyly 24 adam jumys ornyna ıe bolyp, otbasyn asyrap otyr.
«Sońǵy ýaqytta dáriger mamandyǵy men qurylysshyǵa, saýda isinde taýar ótimdiligin arttyratyn saýatty mamandarǵa suranys artyp otyr», deıdi Almaty qalalyq halyqty jumyspen qamtý ortalyǵy basshysynyń orynbasary Ahmetjan Qýantaev. Onyń aıtýynsha, qaladaǵy kóp saýda ortalyqtary satýshy-menedjerler jetispeıtindigin aıtyp, ortalyq arqyly jumysshy izdeý kórsetkishi keıingi kezde kóbeıgen. Odan ózge, tiginshi men tájirıbeli esepshi mamandyǵyna da suranys kóp. Jumysshy izdegen tapsyrýshylardyń talabyn qamtamasyz etý úshin Halyqty jumyspen qamtý ortalyǵy birqatar mamandyq boıynsha azamattardy oqytý, qaıta daıarlaý isine jumyldyryp, mamandyqqa saı beıimdeý ústinde.
«Jumyspen qamtýdyń jol kartasy-2020» baǵdarlamasy boıynsha Almatyda 332 adam áleýmettik jumys ornymen qamtylsa, qala boıynsha bul kórsetkish 500 adamǵa jýyqtady. Al qazirgi daǵdarys jaǵdaıynda jumyssyzdyqpen kúresý maqsatynda iske qosylǵan «Jastar baǵdarlamasy» boıynsha 350 azamat eńbekke tartylyp, turaqty jumys ornymen qamtylǵan. Oqý bitirgen kóptegen jastardyń jumys isteý tájirıbesi bolmaýy sebepti jumyssyzdar qataryn kóbeıtip jatatyny belgili. Osy rette az qamtylǵan otbasylardan shyqqan jáne tájirıbesi joq jastardy jumyspen qamtý úshin qabyldanǵan «Jastar baǵdarlamasy» halqymyz úshin memleket tarapynan jasalǵan úlken qoldaý men naqty kómek ekendiginde daý joq.
Elimizdegi ishki mıgrasııanyń kórsetkishi Almaty qalasy boıynsha óte joǵary. Sol sebepti de basty másele turǵyndardy jumyspen qamtý bolyp otyr. Osy oraıda halyqty Jumyspen qamtý ortalyǵynyń jaýapkershiligi kúsheıip, róli artýda. Máselen, «Jumyspen qamtýdyń jol kartasy-2020» baǵdarlamasy aıasynda «Pansıonat Samal» memlekettik mekemesin kúrdeli jóndeý mindetine júktelgen «Energoremservıs-Almaty» JShS-na qajetti 135 jumysshynyń 13-i qaıta daıarlaý kýrsynan ótip, jumysqa qabyldanǵan. Sondaı-aq, №4 mektep-ınternattyń kúrdeli jóndeýi men seısmoberiktigin nyǵaıtý úshin «Taraz Qurylys Dızaın» JShS suratqan 143 jumysshynyń qazirde 25-i qurylys basynda eńbek etip júr. Medeý aýdanynda boı kótergen jańa muz aıdynyn salý jumysyna 163 jumysshy tartylyp, basqa da qurylys nysandary suratqan mamandar qazirgi tańda biliktiligin arttyrý maqsatynda arnaıy oqý-daıyndaý kýrstarynan ótýde.
Qanat ESKENDIR,
«Egemen Qazaqstan»
ALMATY