Aqmola oblysynyń ákimi Sergeı Kýlagın taıaýda ótken «Aqmola oblysynyń ónerkásiptik áleýeti» aımaqtyq forýmynda jýrnalısterdiń suraqtaryna jaýap bere otyryp, Astana mańyndaǵy eldi mekenderdiń jer máselesine qatysty óz pikirin bildirdi.
2014 jyldyń qazan-qarasha aılarynda júrgizilgen monıtorıng aıasynda ýákiletti memlekettik organdar Selınograd aýdanynyń jer qatynastary salasyna tekserý júrgizip, onyń qorytyndysy boıynsha jer zańnamasyn buzý derekteri anyqtalǵan, dep habarlaıdy oblys ákimdigi.
Atap aıtqanda, jerge jalǵan memlekettik aktiler jasalǵandyǵy belgili boldy (Qoıandy, Qosshy, Talapker, Qajymuqan, Qaraótkel aýyldary). Memlekettik organdar men kásiporyndardyń burynǵy laýazymdy tulǵalarynyń jáne Selınograd aýdanynyń aýyldyq okrýgteri ákimderiniń oıdan qurastyrylǵan tulǵalarǵa arnap daıyndaǵan 2005-2007 jyldar aralyǵyndaǵy jalǵan ókimderi tabylǵan. Bul ókimder arqyly ári qaraı jerge memlekettik aktiler daıyndalyp, jer-kadastrlyq is júrgizýsiz ádilet organdarynda zańsyz tirkelip otyrǵan. Osy syzba boıynsha shamamen 200 jer telimi taratylypty. Buǵan qosa, jerge ornalastyrý jobasyn bekitý úshin jalǵan buıryqtar jasaý jolymen jerdi zańsyz ıelený derekteri de anyqtalyp otyr.
Aqmola oblysynyń ákimi osy derekter boıynsha 2014 jyldyń 20 jeltoqsanynda Memlekettik qyzmet isteri jáne sybaılas jemqorlyqqa qarsy agenttik atyna tıisti tekserý jumystaryn uıymdastyrý týraly hat joldaǵan.
Qazirgi ýaqytta Bas prokýratýra bul derekter boıynsha tergeý jumystaryn júrgizip, zańsyz áreketterdiń oryn alýyna jol bergen birqatar burynǵy basshylar men laýazymdy tulǵalarǵa qatysty qylmystyq ister qozǵady. Al alaıaqtyq áreketterden japa shegip qalǵan azamattar óz quqyqtaryn tek sot tártibimen ǵana qorǵaı alady.
Sondaı-aq, 2014 jyldan beri Selınograd aýdanynyń Qoıandy aýylynda memleketke tıesili jerlerdi ózdiginen ıemdenip alý jaǵdaılaryn sheshý boıynsha júıeli jumystardyń bastalǵanyn atap ótken jón.
Jalpy, túsinikti bolý úshin aıta keteıik, 2007 jyldan bastap Qoıandy aýylynda 19,5 gektar aýmaqtaǵy 195 jer telimin zańsyz ıemdenip alý deregi oryn alǵan, munyń 108 jer telimi memlekettik ıeliktegi, al 87 jer telimi jeke tulǵalardyń jerleri.
Oblys ákimdigi bul máseleni sheshýdiń balamaly ádisi retinde, Qoıandy aýylynyń memlekettik josparynyń bólshekti jobalaýyna ózgertýler engizdi, ıaǵnı salynǵan turǵyn úıler men jobalanǵan joldardaǵy qyzyl jolaqtar esepke alynǵan.
Búgingi kúni jeke turǵyn úı qurylysyna arnalǵan maqsatty jer telimderi saralanyp, shekara telimderi qaıta bólindi, jer telimderi ıeleriniń azamattyq-quqyqtyq mámilege kelýleri úshin múmkindik berý maqsatynda jerge memlekettik aktiler daıyndaldy.
Jerge memlekettik quqyq buzýshylyqty joıý úshin aýdannyń jergilikti atqarý organy osyǵan deıin menshiktelip alynǵan memleket úlesindegi jer telimderin memleket qajettiligi úshin qaıtaryp alýǵa jatatyn jeke tulǵalardyń jerlerimen barabar aıyrbas jasady.
Búginde 168 jer telimderi boıynsha azamattyq-quqyqtyq mámileler júzege asyrylǵan, qyzyl jolaqtarda ornalasqan 6 jer telimi boıynsha belgisiz tulǵalardyń zańsyz ornatqan irgetastary súrilip tastaldy.
Qalǵan 21 jer telimi boıynsha menshik ıeleri men ıemdenip alýshy sýbektiler arasynda satyp alý-satý sharttary túziletin bolady.
2014 jyldan beri Astana qalasynyń mańyndaǵy aımaqta, atap aıtqanda Qoıandy aýylynda jer telimin zańsyz ıemdenip alýdyń jańa deregi tirkelmegen. Jergilikti atqarý organdary quqyq qorǵaý qurylymdarymen birlesip eldi mekenderge turaqty monıtorıng jáne osyǵan uqsas derekterdi boldyrmaý maqsatynda túsinik jumystaryn júrgizip otyrady.
«Adamdar kináli emes, olar adal nıetpen satyp alǵan jáne ókinishke qaraı, aldanyp qalǵan. Men áý bastan solardyń jaǵynda bolǵanmyn. Biz ymyraǵa kelý sheshimderin izdeýdemiz jáne tabamyz degen oıdamyz. Adamdardy renjitýge bolmaıdy, olardyń esh kinási joq», dedi ákim.
О́ńir basshysy sóziniń sońynda tıisti qyzmetterge bul máseleni tolyq zerdeleýdi tapsyryp, zańdyq turǵyda sheshilýi úshin naqty ýaqyt belgilep berdi.
Baqbergen AMALBEK,
«Egemen Qazaqstan»
Aqmola oblysy