Almatyda qaıǵyly oqıǵa bolǵan kúni eldi dúrliktirip sybys taratqandar da ustaldy.
Almaty qalalyq IID resmı ókili, polısııa maıory Saltanat Ázirbek bizben áńgimesinde bylaı dedi:
– Qoǵamdyq ortada dúrbeleń týǵyzǵan 1993 jyly týǵan Ch. esimdi azamatsha, JOO biriniń stýdenti – áleýmettik jelide City Plus saýda ortalyǵynda adamdar kepildikke alyndy dep qana qoımaı, kisi ólimi bar... dep jantúrshigerlik sybys taratqan. Al 1993 jyly týǵan A. esimdi azamat kommýnıkasııalyq jeliniń resýrstaryn paıdalanyp, «Juldyz» shaǵyn aýdanynan qalaǵa bet alǵan qarýly top jolynda kezdeskenderge oq atyp keledi dep dúrliktiredi. Eki «habarshy» da ustaldy, qazir olardan Qazaqstan Respýblıkasy Qylmystyq Kodeksiniń 274-babynyń 2-shi tarmaǵy boıynsha jaýap alynýda.
Osyǵan oraı qalalyq IID resmı ókili «Egemen Qazaqstan» gazeti arqyly azamattardyń qaperine myna jaıtty salýymyzdy ótindi:
–Biz barsha azamattarymyzdy Táýelsiz elimizdiń Zań aktilerin uqypty túrde saqtaýǵa shaqyramyz. Qazaqstan Respýblıkasynyń Qylmystyq Kodeksiniń jańa redaksııasynda «Kórineý (bile tura) jalǵan aqparatty BAQ nemese aqparattyq-kommýnıkasııalyq jelilerdi paıdalaný arqyly taratýshylardyń jaýapkershiligin qaraıtyny» atap kórsetilgen. Sondyqtan da árbir azamat ondaı qadam jasamas buryn on oılanyp, júz tolǵanýy tıis. Hal-qaderinshe tek qana naqty aqparatqa qulaq asqany jón, – dedi Saltanat Ázirbek.
Bizge málim bolǵany, jedel izdestirý sharalarynyń arqasynda halyqty dúrliktirip, jalǵan habar taratqan ózge de azamatttardyń esimderi anyqtalypty. Qazir olar izdestirilip jatyr.
Bir sózben aıtqanda Almaty polısııasy kásibı bilgirligin ádettegishe eshbir dabyrasyz atqarý ústinde. Opat bolǵan bozdaqtar úshin shyn kóńilmen qaıǵyrǵan qala turǵyndary tártip saqshylary oqqa ushqan oryndarǵa gúl shoqtaryn ákelip qoıýdan jalyǵar emes...
Keshe qala ákimi Baýyrjan Baıbek polısııa starshınasy, arnaýly 2-shi batalonnyń polısııa qyzmetkeri Aıan Ǵalıevtiń otbasyna Alataý aýdanynyń «Saıaly» shaǵyn aýdanynan 2 bólmeli páterdiń kiltin tapsyrdy. Aıannyń qart anasyna arnap sóz sóılegen ákim «Sizdiń ulyńyz teńdessiz erlik jasady, ókinishke qaraı ómirin qıdy. Myna páterdiń kiltin Elbasynyń ózi usynyp otyr, marqumnyń artynda qalǵan balalary qashan da qamqorlyqta bolady» dedi.
Shynynda da, qaraqshymen betpe-bet kelip qalǵan Aıan Ǵalıev óte aýyr jaraqat alǵanyna qaramastan aqyrǵy demin jınap, qylmyskerge oq atyp úlgergen. Aıannyń eń sońǵy oǵy qylmyskerdiń jolyn kesti. Eger ol oq tımegende qandyqol qylmyskerdiń taǵy qanshama beıbit jannyń ómirine qaýip tóndirerin oılaýdyń ózi óte aýyr. Almatyda ótken qaraly jıynda Aıannyń sol erliginen qulaǵdar bolǵan halyqtyń Balýan Sholaq atyndaǵy sport kesheniniń úlken zalyn kúńirente «ah» urǵany da esimizde...
Talǵat SÚIINBAI,
«Egemen Qazaqstan»
ALMATY