[caption id="attachment_53103" align="aligncenter" width="560"] Foto: Qazaqstan boks federasııasy[/caption]
Serbııada bokstan ótken halyqaralyq Golden Glove of Vojvodina týrnırinde Qazaqstan bylǵary qolǵap sheberleri 10 altyn medal jeńip aldy. Elimizdiń jastar qurama komandasy 10 salmaqtyń bárinde qarsylastaryn tize búktirip, jalpykomandalyq esepte birinshi oryndy ıelendi. Týrnırge barlyǵy 10 eldiń boksshylary qatysty.
Qazaqstan quramasynda erlerden Evgenıı Pavlov (49 kg), Orazbek Asylqulov (52 kg), Ál-Muhammed Mahmud (56 kg), Sanatáli Toltaev (60 kg), Sadrıddın Ahmedov (69 kg), Nurlan Sabyrov (81 kg), Muhamedjan Taıbaǵar (91 kg) birinshi oryndy ıelense, qyzdar arasynda ótken synda Aqnıet Ábdiqoja (54 kg), Vladıslava Kýhta (60 kg) men Nadıra Maratova (+81 kg) jeńimpaz atandy.
- Boksshylardyń jekpe-jekterin kóńilden shyqty. Bul jarys bıyl qarasha aıynda Reseıdiń Sankt-Peterbýrg qalasynda jastar arasynda ótetin álem chempıonatyna daıyndyq dep qarastyrýǵa bolady. Týrnırden alar sabaǵymyz da kóp boldy. Endi tamyz aınyda Germanııada ótetin taǵy bir halyqaralyq týrnırge qatysamyz. Qazir bizdiń komandada básekelestik óte kúshti. Sondyqtan barlyǵy jeńiske jetýge bar kúsh-jigerin salyp jatyr. Kúzge deıin áli ýaqyt bar. Sol kezde biz álem chempıonatyna qatysatyn boksshylardy iriktep alamyz. Búginde Reseı men Kýba eliniń bylǵary qolǵap ıeleri jaqsy bokstasyp júr. Olar jyl ótken saıyn kúsheıip, qarsylastaryna des bermeı keledi. Bizdiń qurama komanda da osal dep aıta almaımyn. Degenmen óziń myqty bolǵyń kelse tek boksy damyǵan eldermen ǵana kúsh synasý kerek. Sońǵy kezderi Marokkonyń quramasy týraly jıi aıtylyp júr. Boksta osyndaı kózge kórinbeı júrip, sharshy alańd tosynsyı jasaıtyn elder de bolady. Afrıka elin solardyń qataryna jatqyzar edim. Demek, Qazaqstan quramasyna barlyǵyna daıyn bolyp, "beldikti" tartyp júrý kerek. Al ázirge komandamyzdyń jekpe-jekteri kóńilden shyǵady, – deıdi jastar qurama komandasynyń aǵa jattyqtyrýshysy Ǵalym Kenjebaev.
Dastan KENJALIN