Búgin fýtboldan «Astana» klýbynyń bas jattyqtyrýshysy Stanımır Stoılov Shotlandııanyń «Seltık» komandasymen ótetin oıyn jaıly óz oılarymen bólisti.
Komandanyń bas jattyqtyrýshysy erteńgi matchqa oıynshylardyń daıyn ekendigin, «Seltıkpen» kezdesýde «Astana» jeńiske jetýge bar kúshin salatynyn aıtyp ótti. Sonymen birge ol matchtyń ońaı bolmaıtynyn, buǵan deıin Lıtvanyń «Jalgırıs» klýbymen ótken oıynda komanda kóp kúsh jumsaǵanyn aıtty.
«Biz úshin erteńgi oıyn mańyzdy. Eger «Astana» birinshi bolyp dop soqsa, jeńiske jetýge múmkindigi bolady. Kezdesýde Tańat Nóserbaev oınamaıdy. Azat Nurǵalıev oınaıdy. Biz «Seltıktiń» oıyndaryn qarap, zerttedik. Shotlandııanyń komandasy bizge tańsyq emes. Bul ujymdy jeńýge bolady», dedi ol.
S.Stoılov «Seltıktiń» jaqsy oınaıtynyn jetkizdi. «Shotlandııanyń klýby jaqsy komanda. Ol kezdesýdiń favorıti bolady», dedi ol. Degenmen, «Astananyń» bas jattyqtyrýshysy jeńiske jetý úshin komandany namysyn qaırap, alańǵa tek jeńis úshin shyǵaratynyn málimdedi.
Dastan KENJALIN