Túrkııa prezıdenti Redjep Taııp Erdoǵan 9 tamyzda Sankt-Peterbýrgke keledi. Túrkııa vıse-premeri Mehmet Shımshek reseılik áriptesi Arkadıı Dvorkovıchpen kezdesýi barysynda osylaı dedi.
«Elshi myrza bizdiń qurmetti prezıdentimizdiń (Redjep Taııp Erdoǵan) tamyzdyń 9-ynda Peterbýrgte bolatynyn rastap berdi», - dedi Shımshek.
Túrik vıse-premeri buǵan eki eldiń arasyndaǵy qarym-qatynasty jedeldetip qalpyna keltirý kerek bolyp turǵanyn qosty.
Arkadıı Dvorkovıch óz kezeginde Túrkııanyń sý-24 ushaǵyn atyp túsirilgeni úshin keshirim suraǵany Ankara men Máskeýdiń arasyndaǵy baılanysty qaıta qalpyna keltirýge jol ashyp bergenin jetkizdi. Sheneýniktiń aıtýynsha, Shımshekpen arada júrgizilgen kelissózder Sankt-Peterbýrgte eki el prezıdentteri kezdesýi úshin «mazmundy negiz» jasap berýge tıis.
«Biz konstrýktıvti kelissózderge daıynbyz. Bizdiń kezdesýlerimizden keıin mınıstrler deńgeıinde kezdesýler ótetin bolady. Eki jaqtyń qarym-qatynasyn qalpyna keltirý saýda-ekonomıka salasyndaǵy is-qımyldy birtindep jandandyrý maqsatynda kezeń-kezeńimen júrgizilýi tıis dep esepteımiz», - dedi Reseı vıse-premeri.
Reseı men Túrkııa arasyndaǵy daǵdarys ótken jyldyń qarasha aıynda túrik ıstrebıteli Sırııa aspanynda Reseıdiń Sý-24 bombardırovshıgine shabýyl jasaǵannan keıin paıda boldy. Reseı prezıdenti Vladımır Pýtın muny terrorshylarǵa bolysý maqsatyndaǵy «tý syrttan soqqy berý» retinde baǵalady. Osydan keıin Ankaramen arada ekonomıkalyq qarym-qatynasqa tosqaýyl qoıyldy.
Eki aradaǵy sýyq qabaq bıylǵy maýsym aıynda Erdoǵan atyp túsirilgen ushaq pen qaza tapqan ushqysh úshin keshirim suraǵannan keıin birtindep jylı bastady.
Túrik prezıdentiniń Reseıge kelýi Anadoly jerinde memlekettik tóńkeris oryn ala jazdaǵannan keıin júzege asqaly tur. Búlikshilder kóterilisi basyldy. Oǵan qatystary bar 10 myńnan astam áskerıler men azamattar tutqynǵa alyndy. Elde osyndaı dúmpý bolǵaly jatqanyn Sırııa jerindegi Reseı áskerıleri túrik áskerıleriniń bir-birlerimen sóılesken radıosıgnaldary arqyly anyqtap, ony jyldam túrik basshylyǵyna jetkizdi. Sonyń nátıjesinde Redjep Taııp Erdoǵan aman qaldy. Munyń sońynan búlikshilderdi aýyzdyqtaýǵa qol jetti. Buǵan túrik halqynyń kóshege shyǵyp, óz eli prezıdentine qoldaý kórsetýleriniń áseri az bolǵan joq.
Al Reseı ushaǵyn atyp túsirgen túrik ushqyshtary qamaýǵa alyndy.
Murat AITQOJA