Elimizdiń Áskerı sotynyń tóraǵasy Sáken Abdýllaev Ortalyq kommýnıkasııalar qyzmetinde ótken brıfıngte Qazaqstannyń Áskerı sot salasynda zamanaýı aqparattyq tehnologııalar keńinen qoldanyla bastaǵanyn málimdedi.
«100 naqty qadam» Ult Josparynyń 20-shy qadamynda barlyq sot prosesterin dybys-beıne tirkeý qurylǵylarymen qamtamasyz etý tapsyrmasy belgilengen. Sot tóreliginiń ashyqtyǵy men onyń qoljetimdiliginiń kórinisi retinde baǵalanatyn mundaı jańashyldyqty júzege asyrý týraly baıandaǵan Sáken Júsipahmetuly jyldyń alǵashqy jartysynda sot prosesteriniń 99,4% dybys-beıne tirkeý júıesin qoldanýmen qaralǵandyǵyn aıtty.
«Búgingi kúni áskerı sottardyń sot otyrys zaldarynyń 69,6%-y dybys-beıne tirkeý júıesimen jabdyqtalǵan. Jyl sońyna deıin barlyq sot otyrys zaldaryn tolyǵymen dybys jáne beıne tirkeý qurylǵysymen jabdyqtaý josparlanǵan» – dedi ol.
Sonymen qatar, búginde sot otyrystarynyń qatysýshylaryn habardar etý de avtomattandyrylǵan. Otyrysqa qatysýshylar Sot kabıneti, SMS-habarlamalar, gıbrıdtik elektrondyq poshtamen qatar, memlekettik organdar arasyndaǵy elektrondyq qujat aınalym júıeleri arqyly habarlandyrý tetikteri iske qosylǵan.
Qazir sottar, sonyń ishinde áskerı sottar da birjaqty aıyptaýdan aryla bastaǵan. Muny saladaǵy sońǵy statıstıkalyq kórsetkishter de aıǵaqtaıdy. Máselen, birinshi jartyjyldyqta qaralǵan qylmystyq ister boıynsha barlyq tulǵalardyń 2,1%-y aqtalǵan. Budan basqa, taraptardyń tatýlasýyna baılanysty qylmystyq jaýaptylyqtan bosatylǵan, merziminiń ótip ketýine baılanysty qysqartylǵan, aqtaý negizderi boıynsha aıaqtalǵan qylmystyq ister sany aldyńǵy jylmen salystyrǵanda 12,6%-ǵa ósken. Esesine, qazir aıyppul, qoǵamdyq jumys, bas bostandyǵyn shekteý jazalary basymdyq ala bastapty.
Sondaı-aq, brıfıng sońyna qaraı spıkerler BAQ ókilderiniń birqatar saýaldaryna jaýap bere kele, Áskerı sot tóraǵasy ótken jyly Aqtaýda oqý-jattyǵý kezinde oryn alǵan 4 áskerı azamattyń qazasyna qatysty qylmystyq is aldaǵy kúnderi sot qaraýyna túsetindigin aıtty. «Qazirgi ýaqytta mamandar qylmystyq is materıaldarymen tanysýda. Bas áskerı prokýratýranyń málimetinshe 10 kún ishinde qylmystyq is Aqtaý garnızonynyń áskerı sotyna jiberilýi tıis» – dedi Sáken Júsipahmetuly.
Nurlybek DOSYBAI,
«Egemen Qazaqstan»