Kókshetaý qalasyndaǵy «Suńqar» shaǵyn aýdanynda paıdalanýǵa berilgen úıde 16 soǵys ardageri men múgedegi jaıly páterlerge qonystanǵan bolatyn. Áıtkenmen, memlekettik turǵyn úı qoryndaǵy bul páterler jalǵa berilgen edi. Maıdangerler óz páterlerin jekeshelendirý týraly ótinish-tilekterin de aıtýmen keledi. Elbasy Nursultan Nazarbaev osyǵan baılanysty «Turǵyn úı qatynastary týraly» Zańǵa ózgerister men tolyqtyrýlar engizý týraly Jarlyqqa qol qoıdy. Onda soǵys ardagerlerine qatysty kóptegen jeńildikter qarastyrylǵan.
Jýyrda Otan jaýyngerleriniń tilegi oryndalyp, Aqmola oblysynyń ákimi Sergeı Dıachenko olarǵa jekeshelendirý týraly kelisim-sharttardy tapsyrdy. Sondaı-aq, oblys jáne qala ákimderi soǵys ardageri Shámil Maǵaýın men jaýynger jesiri Marııa Omarovanyń shańyraǵynda bolyp, otbasyna qut-bereke tiledi.
Baqbergen AMALBEK.