10 aqpannan bastap «Shans» meıirimdilik ortalyǵynyń uıytqy bolýymen Kókshetaý qalasynda múgedekterge arnalǵan shaǵyn avtobýs arnaıy marshrýty ashyldy.
Aqmola oblystyq múgedekter qoǵamynyń tóraǵasy Vasılıı Shımanskııdiń aıtýynsha, osy maqsatqa Almatydaǵy respýblıkalyq «Sábı» qaıyrymdylyq qory 80 myń AQSh dollary kóleminde qarjy bólip, barlyq qolaıly jaǵdaılar qarastyrylǵan germandyq «Folksvagen-Transporter» shaǵyn avtobýstary satyp alyndy. Endigi kúni ol oblys ortalyǵyndaǵy – 95, sonymen birge, aımaqtaǵy 640 múgedek janǵa qyzmet kórsetetin bolady.
Qazirdiń ózinde avtobýstyń aýrýhana, bank júıesi, áleýmettik qamtý, kommýnaldyq qyzmet oryndaryna jetkizý baǵyttary, qozǵalys kestesi, aldyn ala telefonmen tapsyrys berý qyzmeti jumys isteı bastady. Aldaǵy kezde avtobýstar sany men qyzmet aýqymyn keńitý baǵytyndaǵy uıymdyq-qarjylyq máseleler sheshimin tappaq.
Baqbergen AMALBEK, Aqmola oblysy.