[caption id="attachment_54473" align="aligncenter" width="560"] vesti.kz[/caption]
Búgin Shotlandııanyń Glazgo qalasynda fýtboldan ÝEFA Chempıondar lıgasynyń úshinshi kezeńinde «Seltık» pen «Astana» komandalary kezdesti.
Kezdesýde «Seltık» 2:1 esebimen jeńiske jetti. Matchta birinshi bolyp esepti alań ıeleri ashty. Oıynnyń birinshi taımynyń sońynda «Seltıktiń» shabýylshysy Lı Grıffıtıs 11 metrlik penaltıden dopty torǵa toǵytty. «Astana» ekinshi taımda esepti teńestirdi. Alańǵa Azat Nurǵalıevtiń ornyna shyqqan Azız Ibraımı «Seltık-Park» stadıonyna jınalǵan jurtshylyqqa tosyn «syı» jasady. Ol 62 mınýtta alystan shirene dop soǵyp, eki oıyn boıynsha esepti teńestirip ketti.
Komandalardyń birinshi kezdesýi 1:1 esebimen aıaqtalǵan bolatyn. Endi «Astanaǵa» Chempıondar lıgasynyń toptyq týrnırine shyǵý úshin alań ıelerin jeńý nemese oıyndy 2:2 esebimen aıaqtaý kerek boldy. Alaıda «Astananyń» alǵa qoıǵan maqsaty, armany bul joly oryndalmady. «Seltık» matchtyń sońynda taǵy da penaltıden ekinshi dobyn soǵyp, jeńisti sýyryp áketti. «Seltıktiń» quramynda Mýssa Dembele ekinshi goldyń avtory atandy. Endi «Astana» jarysty Eýropa lıgasynda jalǵastyrady.
Dastan KENJALIN