Depýtattar jarty mıllıard teńgeni qutqaryp qaldy
Mańǵystaýda jylda ótetin úlken shoýlardyń biri oblystyq máslıhat depýtattary tarapynan synǵa alynyp, keri qaıtaryldy.
О́ńirdegi bıyl úshinshi ret ótkizilýi josparlanǵan «Aktau Open Fest» sharasynyń bıýdjettiń qaltasyna salar salmaǵy óte aýyr edi. 2014 – 2015 jyldary birneshe mıllıondardy jelge ushyrǵan atalǵan joba bıyl kúshine qaıta minip, aýyzdy arandaı ashyp, oblys bıýdjetine qol salǵan edi. Surap otyrǵan qarjysy 550 mln. teńge! Naqtyraq aıtsaq, 300 mln. teńgeni bıýdjetten, al 250 mln. teńgeni munaı kompanııalaryn tartý arqyly tabý josparlanǵan.
Mańǵystaý oblystyq máslıhatynyń ekinshi sessııasy qarsańyndaǵy turaqty keńes otyrysynda bul másele tartysty pikirtalasqa negiz boldy. Jarty mıllıardtan astam teńgeniń shoý-shýǵa jumsalǵaly turǵanyn kórgen S.Musabaev, N.Sársenbaı, A.Salmanov, M.Dúısenbaı, taǵy da basqa depýtattar birden narazylyq tanytady. Depýtattardyń narazy pikiri buǵan deıin bas shulǵı bergenge ábden eti úırenip ketkender úshin tosyn, ıaǵnı kútpegen jaǵdaı bolǵan sııaqty. Bıýdjetti qorǵaýǵa kelgen oblys ákiminiń ekonomıka boıynsha orynbasary Sh.Ilmuhambetova sol jerge Mańǵystaý oblysy ákiminiń keńesshisi E.Ismaılovty shaqyrtty. Alaıda, depýtattar E.Ismaılovtyń ýájine qulaq aspaı, tabandap otyryp aldy jáne osynsha qarjy bólý jónindegi sheshim bekitiletin bolsa, mandattaryn tapsyratynyn da aıtty. Sessııadaǵy aıtysty tyńdaǵan Mańǵystaý oblysynyń ákimi A.Aıdarbaev bul joly kóregendik tanytyp: «Depýtattar qarsy degen sóz, demek halyq qarsy degen sóz. Halyq qoldamaǵan sheshimdi men de qoldamaımyn!» – dep bir-aq qaıyryp, aıtys-tartystyń núktesin qoıdy.
Osymen atalmysh festıvalǵa bıýdjetten qarjy bólinbeıtin boldy. Halyq qalaýlylary tereń tynystady, biraq festıvaldyń quryǵy uzyn quryltaıshylary qarjy «taýyp» qalaıda ótkize me, joq pa?
Mańǵystaýda mol qarjyny qajet etetin, biraq halyqqa bereri joq, kerisinshe, el arasynda túsinbeýshilikke, tipti, áleýmettik jelilerde narazylyqqa tap bolyp jatqan sharalar men jobalar bir bul ǵana emes. Semınarlar men festıvaldar, konferensııalar men trenıngter, oqýlar... Bulardyń mańyzy men maqsatyn tek uıymdastyrýshylardan basqa eshkim túsinbeıdi, arnaıy berilgen press-relızge súıenip buqaralyq aqparat quraldarynda kórsetetin jýrnalısterge de olardyń ishki dúnıesi jumbaq.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy