Isti bolyp, temir tordyń ar jaǵyna túskenderdiń basty armany, árıne, bostandyq bolsa kerek. Degenmen, tar qapastan shyǵýdan bas tartyp, túrme tórinde kóbirek júrýdi qalaıtyn jandar da barshylyq eken.
Bálkim, mundaı beıǵam jandardyń otbasy, ortasy joq, tirshiligin túrmemen birjolata baılanystyrǵan qany buzylǵan qanypezerler bolar dep oılap otyrǵan bolarsyz. Joq, biz áńgime etkeli otyrǵan Maqsat Yqylasov – ata-anasy bar, kádimgi tolyqqandy otbasynan shyqqan jan.
Taraz qalasyndaǵy túrmelerdiń birinde jazasyn ótep júrgen Maqsattyń osydan jeti aı buryn bostandyqqa shyǵýǵa múmkindigi bolypty. Iаǵnı, jergilikti sot onyń merziminen buryn bosap shyǵý týraly ótinishin qanaǵattandyrǵan. Biraq dál osy kezde sottalýshylardyń arasynda fýtboldan chempıonat ótip jatqan bolatyn. Dop dodasynyń naǵyz qyzǵan kezinde komandasyn tastap ketýge dáti barmaǵan Maqsat bostandyqqa shyǵýdan bas tartady. Muny endi qasyndaǵy joldastaryna degen adaldyq deımiz be, joq, álde jaı ǵana dopqa degen qumarlyq deımiz be, áıteýir, Maqsat óz maqsatyna jetti. Fınalda atoı salǵan onyń komandasy eń úzdik atanyp, birinshi orynǵa ıe bolypty.
Álemde fýtbol fanattarynyń nebir qıturqy áreketteri týraly estip-bilip júrmiz. Biraq dóńgelek dop úshin abaqtydan shyǵýǵa asyqpaǵan jandar tek sheteldiń shytyrman kınolarynda ǵana kezdesse kerek. Prokýrorlar M.Yqylasovtyń sotqa merziminen erte shyǵý týraly ótinishin qaıta joldap, nátıjesinde túrme basshylyǵy tarapynan minez-qulqy oń baǵalanyp, tek maqtaý alǵan M.Yqylasov jaqynda bostandyqqa shyqty.
Oralhan DÁÝIT,
«Egemen Qazaqstan»
Jambyl oblysy