Brıtanııanyń Hereford degen qalashyǵynda AQSh prezıdenttigine kandıdat, mıllıarder Donald Trampqa uqsaıtyn aǵash ósip tur. Jergilikti jurt ony «mıllıarder aǵash» atap ketipti. Baı bolamyz dep yrymdap nemese jaı ǵana áleýmettik jelige salý úshin aǵashtyń janynda fotoǵa túsýge keletin adamdar da kóbeıgen.
Mıllıarderden aýmaıtyn aǵashtyń ınternetke taralyp ketken fotosyn eń alǵash osy jerden ótip bara jatqan fotograf Djon Roýlı baıqap qalyp, ǵalamtorǵa salypty. Onyń tabıǵı bitimi sondaı ma, álde bireýler ádeıi butaǵy men japyraǵyn qyrqyp, mıllıarderge uqsatty ma, ol jaǵy belgisiz.
D.Tramp AQSh-taǵy eń qaltaly hám ataqty adamdardyń biri sanalady. Ol jastaıynan jyljymaıtyn múlik jáne qurylys bıznesimen aınalysyp, zor jetistikke jetken. Forbes jýrnaly 2015 jyly D.Tramptyń bar baılyǵyn 4,1 mıllıard dollarǵa baǵalaǵan.
Nurhan ASQAR