Atadan balaǵa, odan ári nemerege ulasqan kásipti kıeli sanap jatatyn áýletter bar. Bul da bolsa, olardyń óz kásibine degen adaldyǵy men sheksiz qurmeti bolar. Osyndaı temirjolshylar dınastııasynyń biri Jambyl jol bólimshesinde eńbek etedi. Ol – Qadyrsyzovtar áýleti.
Atalǵan áýlettiń atasy Esebaı 1930 jyly otyz jasynda ózen men jol boıyn jaǵalaǵannyń ózegi talmas degen qazaqy qaǵıdamen temirjolǵa qyzmetke kelgen. Az ýaqytta ár isine asa tııanaqty azamatty baıqaǵan basshylyq ony júk poıyzdarynyń kondýktory etip bekitipti. Qazaq dalasyna qara daýyl qasiret ákelgen ol zamanda áleýmettik jaǵdaı sát saıyn shaıqalyp, shatqaıaqtap baryp áreń turatyn. Osyndaı qıyn kezeńde júk poıyzdaryna jaýapty bolý kim-kóringenge júktele bermeıtin.
Esebaı Qadyrsyzov osy jumysty Ekinshi dúnıejúzilik soǵys aıaqtalǵanǵa deıin abyroımen atqaryp, múltiksiz qyzmeti úshin birneshe ret marapattalǵan. Osynaý 15 jylda halyq ashtyqtan qynadaı qyrylǵan eń zulmat náýbet te ótti. Al soǵys jyldaryndaǵy temirjoldarda bolǵan qıyndyqtar óz aldyna uzaq áńgime. Taǵdyrdyń jazýymen, soǵys aıaqtalar shaqta dúnıeden ótken Esebaı keıingi urpaǵy – jalǵyz ulyna temirjolshy bolýdy ósıet etip qaldyrypty.
Aıtan Esbaı soǵys jyldary bar-joǵy 14 jasynda temirjoldyń aýyr jumysyna sanaly túrde baryp, vagon slesary bolyp eńbek jolyn bastaıdy. Áke ósıetin únemi sanasynda jańǵyrta júrip, erjetip qoly uzarǵanda Máskeýdiń Kólik ınjeneri ınstıtýtyna oqýǵa túsedi. Odan ári vagon sharýashylyǵyndaǵy qyzmeti jalǵasyp talaı belesti baǵyndyrǵan. El-jurtqa eńbegi sińip, qurmetti azamatqa aınalady. «Úzdik vagonshy», «Eren eńbegi úshin» medaldarymen marapattalǵan. Birneshe ret qatarynan depýtat bolyp ta saılanǵan. Eńbek jolynda kóptegen shákirtter baýlyp, óziniń isin jalǵastyrýshy býyndy tárbıelep shyǵarǵan. Ony qazir jas býyn vagonshylar jıi eske alyp turady.
Qazirgi tańda bul otbasynyń 14 múshesi otandyq temirjoldyń túrli salasynda talmaı eńbek etip keledi. Jalpy, temirjolshy Esebaı áýletiniń osy saladaǵy jumys ótili 356 jyldy quraıdy eken. Mundaı eńbekqor áýlet búgingi kúnde qaı otbasyǵa bolsa da úlgi.
Nurbaı ELMURATOV,
«Egemen Qazaqstan»