«Egemen Qazaqstan» gazetinde jarııalanǵan (22 shilde, 2016 jyl) Aınash Esalıdiń «Internattyń balasy...» atty maqalasyna oraı Mańǵystaý oblysy, Túpqaraǵan aýdany, Fort-Shevchenko qalasy ardagerleriniń pikirleri tómendegideı.
«Fort-Shevchenko qalasynyń ardagerleri «Egemen Qazaqstan» gazetinde jarııalanǵan «Internattyń balasy»... atty maqaladaǵy respýblıkalyq mektep mártebesiniń saqtalýyn maquldap, tolyqtaı qoldaıdy jáne tileýlestigin bildiredi. 1972 jyly negizi qalanǵan O.Jáýtikov atyndaǵy respýblıkalyq daryndy balalarǵa arnalǵan mamandandyrylǵan fızıka-matematıka mektep-ınternaty – «Úzdik olımpıadalyq komanda» nomınasııasyn 10 jyl qatarynan ıelenip kele jatqan «Úzdik olımpıadalyq mektep» retinde moıyndalǵan ujym. Qazaqstandy damytýdyń Ult Josparyna sáıkes joǵaryda atalǵan respýblıkalyq mektep-ınternattardy saqtap qalý ǵana emes, qaıta olardyń aıasyn keńitip, kemel damýdyń jolyna salý mindeti tur. Bul jaǵdaıdy aıtýǵa sebep – respýblıkamyzdyń qazirgi kúni de ár aımaǵynda qabiletti, aty atalǵan túlekterden asyp túspese, kem túspeıtin qanshama daryn ıeleri barshylyq. Bul mektep-ınternattardyń kemeldi keleshegine áli de talaı talanttardyń taǵdyry baılanǵan. Kezinde osy respýblıkalyq mektep-ınternattardyń jolyn «onda tek Almaty qalasynyń balalary oqıdy» degen jalǵan aqparattar arqyly kespek bolǵan jaǵdaılar da kezdesti. Atalmysh mektepterde respýblıkanyń ár túkpirinen kelgen balalar da, aýyl balalary da oqyp jatyr. Sol Almatynyń balasy da qazaqtyń balasy, aýyldyń balasy da qazaqtyń balasy...
Boqan TAŃǴULOV,
Fort-Shevchenko qalalyq ardagerler uıymynyń tóraǵasy, Túpqaraǵan aýdanynyń «Qurmetti azamaty»