Otandyq balet juldyzy, «Astana Opera» teatrynyń jetekshi solısi Baqtııar Adamjan Seýlde ótken XIII halyqaralyq bı baıqaýynda jeńiske jetti. Ártis «Klassıkalyq bı» sanaty boıynsha erler arasyndaǵy eresekter tobynda vırtýozdyq tehnıkasymen jáne kásibı sheberligimen kózge túsip, kórermenderdi tańǵaldyrdy ári qazylardyń da kóńilinen shyǵa bildi. Nátıjesinde, 1-shi orynǵa ıe boldy.
6-10 tamyz aralyǵynda Koreı Ulttyq teatryna dúnıe júziniń beldi balet ártisteri jınaldy. Onda 11 jastan 35 jasqa deıingi bıshiler úsh sanat boıynsha baq synady. Olar: klassıkalyq, qazirgi zamanǵy jáne halyq bıi.
Baqtııar Adamjan shilde aıynda Ystanbul qalasynda ótken Balet ártisteriniń V halyqaralyq konkýrsynda bas júldeni ıelenip, eline jeńispen oralǵan edi. Keıin bir aptalyq demalystan keıin ol Seýldegi baıqaýǵa qatysý úshin birden daıyndyqqa kirisedi. Ártis klassıkalyq baletterden L.Mınkýstyń «Baıaderkasyn», B.Asafevtiń «Parıj jalynyn», S.Pýnıdiń «Esmeraldasyn», sonymen qatar, qytaılyq horeograf Isıan Chjannyń qoıylymyndaǵy «Oıaný sátinde» (In the wake) atty zamanaýı týyndysyn sahnaǵa shyǵarady. Bıshiniń pikirinshe, joǵary deńgeıde óner kórsetý úshin, eń aldymen, jaqsy kóńil-kúı jáne fızıkalyq daıyndyq qajet eken, sol sebepti, ol konkýrs barysynda dál osy qaǵıdany basshylyqqa alypty.
Sonymen qatar, Baqtııar Adamjan konkýrs aıasynda joǵary kásibı tehnıkalyq deńgeıimen erekshelenetin koreı balet mektebimen jaqynyraq tanysýǵa múmkindik alǵanyn, bul onyń kásibı turǵyda shyńdala túsýine yqpal etkenin aıtady.
Al baıqaýdyń qazylar alqasynyń quramynda «Astana Opera» teatry balet trýppasynyń dırektory, Qazaqstannyń eńbek sińirgen qaıratkeri Tursynbek Nurqalıev te bolypty. Baletmeıster álemdik balet elıtasyn shyńdaǵan jobaǵa qatysý úlken qurmet ári jaýapkershilik ekenin jetkizdi. «Bizdiń ártisterimizdiń shyǵarmashylyq áleýeti joǵary, bul olardyń aldyńǵy qatarly álemdik sahnalarda tabysty óner kórsetýlerine, aıtýly baıqaýlarda júldeli oryndarǵa ıe bolýlaryna múmkindik berip keledi. О́nerpazdarymyzdyń tabystary, olardyń kásibı sheberlikteri men balet ónerine degen súıispenshiligi meni aıryqsha tebirentti. Halyqaralyq deńgeıdegi mamandardyń qazaqstandyq ártisterge bergen baǵasy da joǵary. Bul Otanymyzǵa degen maqtanyshymyzdy molaıta túskendeı boldy», – deıdi Tursynbek Nurqalıev.
Láıla EDILQYZY,
«Egemen Qazaqstan»