Jaqynda Almaty qalasynyń turǵyny Moldııar Serikbaev aǵamyzǵa hat keldi. Hat kelgende annan-munan emes, keshegi Keńes Odaǵynyń astanasy, bas qalasy bolǵan Máskeýden. Hatty Máskeý qalasynyń mádenıet departamenti joldapty. Onda qazaǵymyzdyń mereıin ósiretin, janyna jaǵymdy jańalyq súıinshilegen aqjoltaı habar bar.
Sóıtsek, buryn geolog bolǵan, keıin mádenıettanýshylyqpen bel sheshe aınalysyp júrgen, «Egemenniń» Almaty bólimshesine árkez erkindep kiretin ardager aqsaqalymyz Máskeýdiń bılik oryndaryna halqymyzdyń birtýar uly, Sherhan Murtazasha aıtsaq, qyzyl jebesi Turar Rysqulovtyń esimin este qaldyrý týraly birneshe márte másele kóterip, hat jazǵan eken. «Tamshy tas jarady» demekshi, osy másele boıynsha otandyq tarıh pen mádenıettiń asa kórnekti oqıǵalary men qaıratkerlerin este qaldyrý jónindegi komıssııa ótken jyldyń 2 jeltoqsanynda oń sheshim qabyldapty. Atap aıtqanda, Reseı Federasııasyndaǵy Qazaqstan elshiliginiń ótinishine oraı Pokrov býlvary, 14-úı meken-jaıy boıynsha ózi Máskeýde turǵan úıde memleket qaıratkeri Turar Rysqulovqa arnalǵan eskertkish taqta ornatylatyn boldy.
Qorǵanbek AMANJOL.