Aqynnyń máńgilik mereıi

Endi biraz kúnderden keıin uly Jambyldyń týǵanyna 165 jyl tolady. Soǵan baılanysty Jetisý óńirinde aqyn dańqyn asqaqtatý maqsatymen birqatar aýqymdy sharalar qolǵa alyn­dy. Atap aıtqanda, res­pýb­lıkalyq aqyndar aıtysy men oblystyq oqýshylar aıtysyn, jyr músháırasyn uıymdastyrý, mektepterde ótkiziletin taqy­ryp­tyq keshtermen qatar, 5 sy­nyptan bastap árbir órenge Jambyldyń jyryn jattatý sııaqty mazmundy jumystar óristegen. Aqynnyń 165 jyldyǵyn atap ótý daıyndyǵyna ótken jyl­dan bastap-aq qyzý kirisken jerlesteri áýeli onyń murajaı ǵımaraty men kesenesin jón­deýdi oılastyryp edi. Oblys áki­miniń tikeleı tapsyrmasymen júzege asyrylǵan bul jumys­tyń tııanaǵy týraly Jambyl murajaıynyń dırektory Máý­len Qojashev bylaı dedi. – Men osy mýzeıge 1974 jyly qyrkúıekte bas qor saq­taýshy bolyp qyzmetke turdym. Sodan beri aǵymdaǵysy bar, bas­qasy bar birneshe márte jón­deý jumystary júrgizilse, eń kózge kórinerligi – aqynnyń 150 jyldyǵy qarsańynda oryndal­ǵan jumystar der edim. Endi, mine, oblys ákimi Serik Úmbetovtiń qamqorlyǵy nátıje­sinde byltyrǵy qyrkúıek­tiń 1-inen jeltoqsannyń 10-yna deıingi ara­lyqta jedel jóndelse de, óte sapaly atqarylǵan ju­mystarǵa barsha kelýshiler dán rıza. Mu­rajaıǵa qarasty 7 ǵımaratpen qosa aqynnyń kesenesi, uly kompozıtor Nurǵısa Tilendıev eskert­kishiniń aınalasy túgeldeı abat­tan­dyryldy. Oǵan bıýdjetten 70 mln.teńgeden astam qarjy jum­saldy. Kúrdeli jón­deý jumys­taryn Anatolıı Rıabının basqa­ratyn «Al­maty aýyl qurylys» mekemesiniń ujymy at­qarsa, qo­salqy ju­mystaryn «Kúm­bez» seriktestigi júrgizip, keseneniń kórkin keltirdi. Ata­myzdyń arýaǵy dem bergen bolar, qysqa merzimde qy­rýar is tyndyryldy. Iá, Jambyldyń eń súıikti uldarynyń biri Qojashtyń nemeresi Máýlen  murajaı tizginin  qo­lyna alǵaly da otyz bes jylǵa jýyqtapty. Onyń bilikti bas­shylyǵymen istelgen jumystar az emes. Qaı kezde kelseńiz de aınalasy muntazdaı tap-taza. San alýan gúlge oranyp, baǵynda bul­bul saıraǵan murajaıdyń aýla­syna kirgen adamnyń shyqqysy kelmeıdi. Aqynnyń kózi tirisinde aǵash­tan salynǵan úıdiń  12 bólme­sindegi jádigerlerdi tamashalap, 150 jyldyq mereıtoıy qar­sańynda 900 sharshy metr aý­maǵynda qosymsha salynǵan má­jilis zalyn erkin aralaıtyn kelýshilerdi mýzeı qyzmetkerleri qashan bolsyn qushaq jaıa qarsy alady. Sondyqtan da shyǵar, Jambylǵa taǵzym etý úshin jyl saıyn eń keminde 11-12 myń adam at basyn burady. Álemniń ár túkpirinen aǵy­latyn asa mártebeli qonaqtary da úzilmeıdi. Murajaı ujym­nyń 2002 jyldan beri oblys­taǵy 22 murajaı arasyndaǵy ózara básekede «Altyn sapa» belgisine turaqty ıe bolǵany jarqyn jetistiktiń biri deýge bolar. Jambyl degen sózdiń tórki­nin qamal dep uǵynamyz. Ol rasynda, halqyna qamal bola bildi. Otyzynshy jyldardaǵy asharshylyq pen alasapyran qý­ǵyn-súrgin kezinde eliniń rý­hyn saqtap qaldy. Jantalasqan soǵysta, jan-jaǵynan jaýy antalap jetkende, Neva ózeni bo­ıyndaǵy keshegi Lenıngradty shynaıy qamalǵa aınaldyrǵan da Jambyldyń jalyndy óleńi bolatyn. Onyń árbir shýmaǵy qorshaýdaǵy elge dem berdi, oq bolyp atyldy, snarıad bolyp jaryldy. Mıllıon jol óleńdi ja­dyna tutyp, jatqa sapyratyn dastandaryn tyńdaǵan ádebıet sarapshylary toqsannan asqan qudiretti aqynnyń darynyna shúbásiz bas ıgen kúnderden beri de 70 jyldan asypty. Álem áli Jambyldyń qupııasyna tamsanýmen keledi. Alashyn jyryna qosyp, tatýlyqty tý etken Qataǵanmen aıtysyn áli kúnge jyrsúıer qaýym boı­tumardaı baǵalaıtynyn da aıtpaı ketý ábestik. Qazaqtyń tól­qujatyndaı bolǵan onyń mártebesi qashan da joǵary. Kúmisjan BAIJAN. Almaty oblysy.