16 aqpanda Ortalyq saılaý komıssııasynyń tóraǵasy Qýandyq Turǵanqulov AQSh-tyń Qazaqstandaǵy elshiliginiń ýaqytsha senimdi ókili Djon Ordveımen onyń ótinishi boıynsha kezdesti. Kezdesýde Ortalyq saılaý komıssııasynyń tóraǵasy Djon Ordveıdi aldaǵy bolatyn Qazaqstan Respýblıkasy prezıdentiniń kezekten tys saılaýyna daıyndyq barysymen tanystyrdy, dep habarlady OSK-niń baspasóz qyzmeti.
Respýblıka Prezıdentiniń kezekten tys saılaýy eki aı merzim ishinde ótkiziletin bolǵandyqtan, kandıdattar úshin de, saılaýdy uıymdastyrýshylar úshin de negizgi saılaýaldy sharalardy ótkizý ýaqyty birshama qysqarsa da jetkilikti bolyp tabylady. Degenmen, úmitkerlerdiń ózderiniń saılaýaldy sharalaryn uıymdastyrýǵa ýaqytynyń kóbirek bolýyn kózdeı otyryp, biz OSK men aýmaqtyq saılaý komıssııalary úshin keıbir rásimderdi ótkizý merzimin qysqartý qajet dep sheshtik. Sońǵy jyldary ótkizilgen saılaýlarda saılaýshylardyń elektrondy bıýlletendermen daýys berý dınamıkasyn eskere otyryp, aldaǵy saılaýda «Saılaý» AAJ qoldanylmaıdy degen toqtamǵa keldik, dedi Qýandyq Turǵanqulov.
Djon Ordveı Qazaqstan Respýblıkasynyń qoldanystaǵy saılaý zańnamasy kez kelgen saılaýdy halyqaralyq standarttarǵa sáıkes ótkizýge múmkindik beretinine senimdiligin bildirdi jáne QR OSK arqyly barlyq saılaýdy uıymdastyrýshylarǵa tabys tiledi. Men Qazaqstanda budan buryn ótken úsh saılaý naýqanynyń kýási boldym. Biz bıylǵy naýqan barysyn da baıqap otyratyn bolamyz, dep atap ótti Djon Ordveı.
Kezdesý sońynda taraptar QR OSK men AQSh elshiliginiń arasynda qalyptasqan yntymaqtastyq pen ózara túsinistik dástúrlerin odan ári jalǵastyrýǵa kelisti.