Astananyń irgesindegi Ilınka eldi-mekeninde Fransııanyń sımvoly sanalatyn «Eıfel» munarasy bar. Ony keıbir adamdar bilse, keıbiri bile bermeıdi. Ol Eıfel munarasyna uqsatyp 2014 jyly salynǵan. Munaranyń bıiktigi – 19 metr. Ony Jambyl esimdi azamat óz úıiniń aýlasynda turǵyzypty.
Jambyl áriptesimiz Raýan Esqalıdiń dosy. Ekeýi 5 jyldan beri bir-birin kórmeı, aıaq astynan kóshede bir kezdesip qalǵanda dosyna úıiniń aýlasynda «Eıfel» munarasyn salyp qoıǵanyn aıtady. Jylt etken jańalyqty jibermeıtin jýrnalıst sony óz kózimen kórý úshin Ilınkaǵa baryp, sýretke túsirip qaıtady.
Jambyldyń aıtýynsha, ol Parıjge baryp kelgennen keıin Eıfel munarasyna uqsas munarany óz aýlasynda salǵysy kelgen. Sodan ári oılanyp, beri oılanyp, 2014 jyldyń maýsym aıynda murananyń qurylysyn bastap, eki aıda salypty. Qazir Ilınkadaǵy Eıfel munarasynan aınaladaǵy barlyq nárse kórinedi. Onyń bıiktigi 6 qabatty úımen birdeı. Osy munarany salǵannan keıin Jambyldyń úıine kelip, munarany tamashalýshylar kóbeıedi. Solardyń biri - uıaly baılanys kompanııalarynyń ókilderi Jambyldyń úıindegi 19 metr munarany estip, úıdiń ıesinen uıaly baılanys quraldaryn ornatýdy ótinedi. Olar munaraǵa baılanys jabdyqtary ornatylsa uıaly baılanys belgisiniń 5 km radıýske tez taraıtynyn aıtyp qoımaıdy. Sóıtip, Jambylǵa ótinish jasap, aqyry eki jaq kelisedi. Árıne, úıdiń ıesi munaranyń joǵarǵy jaǵyn teginge bermeıdi. Qazir uıaly baılanys operatorlary Jambylǵa arendaǵa aqsha tóleıdi.
«Fransııanyń sımvoly sanalatyn «Eıfel» munarasy Almatyda da bar. Ol 2009 jyly salynǵan. Qazir ol týrıster eń kóp sýretke túsetin jáne tamashalaıtyn jerge aınalǵan. Sondyqtan da Astanada da osyndaı bir munara bolsa artyq etpeıdi. Ol kelesi jyly EKSPO kórmesi kezinde de týrıster tamashalaıtyn jer bolýy múmkin», deıdi Raýan Esqalı.
Dastan KENJALIN
Foto: Raýan Esqalı