Qyrkúıektiń 10-nan 11-ne qaraǵan túni, saǵat 23:00-de «Qazaqstan» men KazSport telearnalary tikeleı efırde Gennadıı Golovkın men brıtanııalyq Kellı Brýk arasyndaǵy jekpe-jekti kórsetedi. Bul týraly «Qazaqstan» RTRK» AQ baspasóz qyzmeti habarlady.
Sondaı-aq, kaztrk.kz jáne kazsport.kz. saıttarynda kezdesýdiń onlaın-kórsetilimi júrgiziledi.
Jekpe-jek Londondaǵy 20 myń adamǵa arnalǵan «O2» sport kesheninde ótedi.
Osy kezdesýge deıin Golovkın kásipqoı boksshy retinde sharshy alańǵa 35 ret shyǵyp, sonyń bárinde jeńiske jetken. Ol 33 jekpe-jekte qarsylasyn nokaýtqa jibergen. Al onyń qarsylasy Brýk te eshqasha jeńilmegen. Brýk Golovkınnen bir kezdesý artyq ótkizgen. Demek, 36 ret rıngke shyǵyp, sonyń bárin taza jeńispen aıaqtaǵan. Munyń ishinde 25 aıqasta nokaýtpen jeńgen. Onyń jasy 30-da bolsa, Golovkın bıyl 34-ke keldi.
Gennadıı Golovkın – áýesqoı boksta 350 kezdesý ótkizip, 345 jekpe-jekte jeńiske jetken. 2006 jyldan beri kásipqoı bokspen aınalysyp keledi. Ol orta salmaq dárejesinde WBA (Super), IBO, WBC (Interim) jáne IBF tujyrymdary boıynsha álem chempıony. Al brıtanııalyq Kell Brýk - IBF tujyrymy boıynsha jartylaı orta salmaqtaǵy álem chempıony ataǵyn jeńip alǵan boksshy.
Dastan KENJALIN
Foto: «Qazaqstan» RTRK» AQ baspasóz qyzmeti