Grant oqytýshylardy yntalandyrady

Táýelsizdiktiń alǵashqy jyldarynan-aq Elbasymyz elimizde bilim men ǵylymnyń damýyna, ony qarjylan­dy­rý­ǵa erekshe kóńil bólip keledi. Sońǵy on jylda bilim berýdi  damytýǵa jumsalǵan qarjy on esege artyp, bul kórsetkish 2010 jyly ishki jalpy ónim­niń 4,1 paıyzyna jaqyndady jáne birqatar eýropalyq el­derdiń deńgeıine jetti. Prezıdent óziniń Qazaqstan halqyna bıylǵy Joldaýynda bilim berýdi jańǵyrtý, ony  jańa beleske kóterýge erekshe nazar aýdardy. О́ıtkeni, sapaly bilim ındýstrııalandyrý men ınnovasııalyq damýdyń negizi bolyp tabylady. Jýyrda bolyp ótken Bilim jáne ǵylym mınıstrliginiń alqa májilisinde sóz sóılegen mınıstr Baqytjan Jumaǵulov Bilim berýdi damytýdyń 2011-2020 jyldarǵa arnalǵan memlekettik baǵdarlamasyn iske asy­rý aıasynda alǵashqy ret mu­ǵa­lim mártebesin kóterý máselesi kórinis tapqanyn tilge tıek etken bolatyn. Iá, baǵdarlamada, eń aldymen, pedagogtardyń már­tebesin kóterý, olardyń biliktiligin arttyrý, qarjylan­dy­rýdyń jańa júıesin engizý, ekinshiden materıaldyq ál-aýqatyn arttyrý arqyly ynta­landyrý, úshinshi­den, peda­gog­tardyń bedelin ósirý úshin ba­rynsha aýqymdy jumys­tar júrgizý kózdelgen. Bilim berý isinde mınıstrlik tarapynan joǵary  oqý oryn­darynda eńbek etip júrgen oqy­týshylardyń jaǵdaıyn jaq­sartý, olardyń alańsyz jumys isteýine múmkindik berý, qoldaý maqsa­tyn­da 2005 jyldan beri júzege asyp kele jatqan úzdik oqytýshy memlekettik grantyn belgileýdiń ma­ńy­zy erekshe dep aıta alamyz. Bul sóz joq, jo­ǵary oqý oryn­darynyń oqytý­shylaryna degen úlken kómek. Bul grant ǵylymı izdenisterde jáne pedagogıkalyq qyzmette budan da joǵary   kór­set­­kish­ter­ge qol jetkizýge, ju­mys­ty júıeli, naqty júrgizýge jol ashady jáne pedagog már­te­besin kóteredi. Oqytýshylardyń al­dyńǵy qatarly oqý oryn­da­ryn­da taǵylymdamalardan ótý­le­rine jáne zaman talabyna saı bolýyna kómektesedi. Memlekettik grant oqytýshylardyń ǵy­­lymı-zertteý jumystary men stýdentterge sabaq berýdegi ádis-tásilderin jetildirýge degen yntasyn arttyra tú­se­tini sóz­siz. Elimizdiń bilim berý deń­geıin kóterip, sapa­syn art­ty­rýǵa baǵyttalǵan osy konkýrs aldaǵy ýaqytta da jalǵa­syn tapqany jón dep oılaımyz. Seıdehan ÁLIBEK, M.Áýezov atyndaǵy OQMÝ-dyń fakýltet dekany, tarıh ǵylymdarynyń doktory. Shymkent.