Jýyrda Astanadaǵy «Folıant» baspasynan jýrnalıst-jazýshy Qaısar Álimniń «Seıilmeıtin muń» atty tragedııalyq hıkaıaty jaryq kórdi. Onda Qazaqstannyń halyq ártisi Ánýar Boranbaevtyń ójet óneri men shyrqaýly, shytyrmandy shyǵarmashylyq kezeńi alýan qyrynan jarqyrap ashylǵan.
Kórnekti teatr jáne kıno akteri Ánýar 51 jas qysqa ǵumyrynda sońyna óshpesteı iz qaldyryp ketken dara tulǵa edi. Ol somdaǵan beınelerde áldebir zııalylyqtyń názik sezimi júrek qylyn terbeıtin. Ulttyq dástúrdiń kenishindeı ol til qudiretin tereń sezine bilgen. Rýhanı zerdesi ushqyr, kórermen janyn baýrap alǵan ol ámanda halqynyń ystyq yqylasyna bólenip júretin. Onyń teatr jáne kıno salasynda jasaǵan obrazdary umytylmastaı mura bolyp qalǵany belgili. Áli de halqyna minsiz qyzmet etip kele jatqandaı jáne urpaqtar kádesine de qaltqysyz jaraı beretinine kámil senimdimiz.
Taǵdyr Ánýardy talaı synǵa saldy. Biraq ol moıymady, qaıta sharbolattaı shyńdala tústi. Bir aıaǵynan aıyrylsa da sahnamen qoshtaspaı, óner aıdynynda ójettene órge júzdi. Araǵa biraz ýaqyt salyp, 1994 jyldyń sáýirinde «Ana – Jer – Ananyń» 30 jyldyq merekelik qoıylymyna shyqty. Kórermender súıikti akterin kózderine jas irkip turyp qarsy alǵan edi...
Ánýar óner úshin jaralǵan tulǵa bolatyn. Onyń sáni teatrdyń ajaryn ashatyn. Ultynyń rýhanı kemeldenýine qaltqysyz qyzmet etken has talanttyń adamı bolmysy men mazmundy da abyroıly óner joly keıingi urpaqqa ádemi úlgi bolyp qalǵanyn medet tutamyz.
Mine, avtor «Seıilmeıtin muń» tragedııalyq hıkaıatynda Á. Boranbaevtyń osyndaı qaıtalanbas taǵdyr, talaıyn sheberlikpen ári kórkem óre bilipti. Kitap bylaı aıaqtalady: «Akterdiń muńy seıilip kórip pe? Ásirese, týmysynan talant sybaǵasyn enshilegen sahnagerdiń mańdaıynyń bes eli sory bar, bolar-bolmas baǵy bar, máńgilik seıilmeıtin muńy bar... Ne týsa da muńnan týady. Shynshyl ǵumyr muńnan súzgilenip, elenip, jaratylatyn sekildi...»
... Iá, osy tujyrymdar Ánýar ǵumyrynyń tylsymyn asha túsetindeı!
Sábıt NURBEKOV.