Nazarbaev Ýnıversıtette 67 jastaǵy professor Adesıda Ilesanmı jańa provost bolyp taǵaıyndaldy. Halyqaralyq ǵylymı jáne bilim berý salasynda ol tabysty ǵalym jáne ákimshi retinde tanymal bolyp tabylady. Adesıda Ilesanmı Ýrbana bul qyzmetke deıin Shampeındegi Illınoıs ýnıversıtetinde (AQSh) provost jáne akademııalyq máseleler boıynsha vıse-kansler bolyp qyzmet etken.
Endi ol Nazarbaev Ýnıversıtette jańa provost retinde akademııalyq jáne ǵylymı-zertteý baǵdarlamalaryna, sondaı-aq ǵylymı-zertteý granttaryn taǵaıyndaýǵa jetekshilik etetin bolady. Provosttyń qaraýyna Nazarbaev Ýnıversıtettiń saıasatyna sáıkes sapany qamtamasyz etý baǵdarlamalaryn jasaý jáne iske asyrý máseleleri kiredi.
Doktor Adesıda Berklıdegi Kalıfornııa ýnıversıtetinde 1974 jyly elektr ınjenerııasy mamandyǵy boıynsha ǵylym bakalavry, 1975 jyly ǵylym magıstri jáne 1979 jyly ǵylym doktory dárejesine ıe boldy. 1979-1984 jyldary Kornell ýnıversıtetinde ǵylymı qyzmetker, assıstent-professor qyzmetin atqardy. 1985-1987 jyldary Nıgerııadaǵy Tafava Baleva ýnıversıtetinde elektr ınjenerııasy kafedrasynyń meńgerýshisi boldy. 1987 jyly Illınoıs ýnıversıtetiniń oqytýshy-professorlar quramynyń qataryna qosyldy. 2000-2012 jyldar aralyǵynda ol mıkro- jáne nanotehnologııalar zerthanasynyń dırektory, nano ólshemdi ǵylymdar men tehnologııalar ortalyǵynyń dırektory laýazymdaryn atqardy. Budan basqa osy jyldary ol ınjenerııa fakýltetiniń dekany boldy. Adesıda Ilesanmı 350-den astam resenzııalanatyn maqala jarııalap, halyqaralyq konferensııalarda 250-den astam baıandama jasaǵan. 2011 jyly ol aıryqsha eńbegi úshin IEEE EDS nagradasyna ıe boldy. 2016 jyly ol elektrondyq materıaldar salasyna qosqan zor úlesi úshin TMS boıynsha syılyqtyń Djon Bardınniń fýnksııalyq materıaldar nomınasııasyndaǵy jeńimpazy retinde tanyldy.
«Egemen-aqparat»