Ábish Kekilbaıulyn ısi qazaqqa tanystyryp jatýdyń qajeti joq. Kóziniń tirisinde qarymdy qalamgerligimen, azamattyq bolmysymen ózin jalpaq jurtqa moıyndatyp ketken kemeńgerdiń qazaq qoǵamynan alar orny qashanda bólek.
Qazaqstannyń Eńbek Eri, halyq jazýshysy, Memlekettik syılyqtyń laýreaty atanǵan alty Alashtyń ardaǵyn jerlesteri oryndy maqtan etedi. Jýyrda Mańǵystaý halqy úshin jaǵymdy jańalyq jarııa etildi. Ol oblys ortalyǵy Aqtaý qalasynan Ábish Kekilbaev ortalyǵyn ashý týraly bastama edi.
Aqtaýǵa Astanadan arnaıy kelgen sáýletshiler óńir basshylyǵymen kezdesip, kelisti keshenniń jobasyn talqylady. Bir mezgilde eki myńǵa jýyq adamdy qabyldaı alatyn ortalyq aqshańqan shahardyń 19 «a» shaǵyn aýdanynda ornalaspaq. Zańǵar jazýshynyń ádebı muralaryn saqtaýmen jáne nasıhattaýmen aınalysatyn aıtýly mekeme aıasynda kitaphana, murajaı, konserttik zal jáne kitap dúkeni ashylatyn bolady. Bul ortalyqtyń qurylys jumystary 2017 jylǵa josparlanǵan.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy