Forým jumysy 26 qyrkúıekte 11:00 saǵatta «Rixos President Astana» qonaqúıinde bastalady.
Aýqymdy sharanyń maqsaty – IYU-ǵa múshe-memleketterdiń bilim jáne ǵylymı áleýetin damytý salasynda áriptestikti nyǵaıtý. Sonymen qatar, IYU-ǵa múshe-memleketterdiń ekonomıkasy úshin úzdik tehnologııalardy engizý, ǵylymdy damytýǵa yqpal etý, bilimge negizdelgen qoǵam qurý máseleleri de parlamentshiler nazarynan tys qalmaýǵa tıis. Sondaı-aq, ulttyq ınnovasııa júıesin nyǵaıtý, ǵylymı-tehnıkalyq damý úshin júıelik motıvasııa tetikterin qosý baǵyttaryna da basymdyq beriledi.
Forým aıasynda Bilim, ǵylym jáne mádenıet máseleleri jónindegi ıslam uıymynyń (ISESKO) «Uıymǵa múshe jáne múshe emes memleketterinde ǵylym, tehnologııa jáne ınnovasııa salalarynda normatıvtik-quqyqtyq baza jáne yntalandyrýshy sharalar» baǵytyndaǵy zertteýleriniń tanystyrylymyn ótkizý kózdelgen.
Forýmǵa 25 eldiń parlament ókilderi men sarapshylary, sondaı-aq, halyqaralyq uıymdardyń músheleri qatysady dep kútilýde.
Asa mańyzdy sharanyń uıymdastyrýshylary: Qazaqstan Respýblıkasy Parlamentiniń Májilisi, Bilim, ǵylym jáne mádenıet máseleleri boıynsha ıslam uıymy (ISESKO) jáne Islam damý banki (IDB).
Forým qorytyndysy boıynsha Astana deklarasııasy qabyldanbaq.