L.N.Gýmılev atyndaǵy Eýrazııa ulttyq ýnıversıtetinde el Táýelsizdiginiń 25 jyldyǵy men ulttyq ýnıversıtettiń 20 jyldyǵyna arnalǵan «О́z elim» atty mýzykaly-poetıkalyq kesh ótti. Ony Eýrazııa ulttyq ýnıversıtetiniń «Káýsar» mádenı-tanymdyq birlestigi uıymdastyrdy.
Ýnıversıtet janyndaǵy atalmysh birlestiktiń osyǵan deıin talaı keshter ótkizgenin bilemiz. Ondaǵy óner adamdarymen, ǵalymdarmen, qoǵam qaıratkerlerimen ótken keshterdiń stýdentterge berer taǵylymy erekshe. Bul oraıda birlestik jetekshisi, professor, Qazaqstannyń eńbek sińirgen ártisi Kenjeǵalı Myrjyqbaevtyń eńbegi zor. Keshegi uıymdastyrylǵan konsertte opera ánshisi negizinen týǵan el, týǵan jer taqyrybyna arnalǵan ánderdi shyrqap, tyńdarmannyń yqylasyna bólendi.
Kesh barysynda belgili opera ánshisi Kenjeǵalı Myrjyqbaev О́.Baıdildaevtyń «Týǵan el», K.Kúmisbekovtiń «Aıaýly meken», J. Tursynbaevtyń «Qyz-qaraǵaı», E. Rahmadıevtiń «Bala ǵashyq», L.Hamıdıdiń «Otanym», S. Muhamedjanovtyń «Terbeledi tyń dala», «Qyrmanǵa kel, qalqataı», Á.Beıseýovtiń «Syrlasý valsi», I.Jaqanovtyń «Jaılaýkól keshteri», T.Bazarbaevtyń «Aýylym» ánderin naqyshyna keltire oryndady. Jaı oryndap qana qoımaı, keıbir ánderge túsinikteme berip ótti. Sondaı-aq, Eýrazııa ulttyq ýnıversıtetiniń rektory E.Sydyqovtyń Temirjan Bazarbaevtyń «Aýylym» ániniń shyǵý tarıhyn sahnaǵa shyǵyp áńgimelep berýi tyńdarmandardyń qyzyǵýshylyǵyn týǵyzdy.
Al stýdentter arasynda sáýlet-qurylys fakýltetiniń, jýrnalıstıka jáne saıasattaný, fılologııa jáne zań fakýltetteriniń A.Jaqsylyqova, B.Endibaı, A.Serikbaeva, A.Nurbek, B.Máden sekildi stýdentteri elge belgili aqyndardyń óleńderin oqyp, kórermenderge rýhanı azyq syılady.
Aıta ketý kerek, keshke elge belgili zııaly qaýym ókilderimen qatar stýdentter de qatysty. О́ner keshin Qazaq ulttyq óner ýnıversıtetiniń dosenti, halyqaralyq festıvalderdiń laýreaty Lıýbov Glınka roıalda súıemeldep otyrdy.
Aıgúl SEIILOVA,
«Egemen Qazaqstan»