Tujyrymdama jobasymen tanystyrdy

Keshe Úkimet úıinde Memlekettik hatshy Gúlshara Ábdiqalyqovanyń jetekshiligimen Prezıdent janyndaǵy Áıelder isteri jáne otbasylyq-demografııalyq saıasat jónindegi  ulttyq komıssııanyń kezekti otyrysy ótti. Otyrysty ashqan Mem­lekettik hatshy birinshi kezek­te Elbasy Nursultan Nazarbaevtyń bıylǵy 1 qyrkúı­ekte ótken Parlament sessııa­synyń ashylýyndaǵy: «Qazaq­stan Táýelsizdiginiń 25 jyl­dyq mereıtoıyn qarsy alý – jyldyń eń negizgi oqıǵasy. Bizge elimizdiń barlyq jetistigin saralap, mańyzdy nátıjelerdi qazaq­standyqtarǵa jetkizý óte qajet», degen sózin eske saldy. Odan ári G.Ábdiqalyqova Ult­tyq komıssııa bastamasymen qolǵa alynǵan «25 paıdaly is» atty respýblıkalyq aksııa­syn ótkizýde áıelder qaýy­mynyń úlken úlesi bar ekenin jetkizdi. «Aksııa aıasynda da­ryndy jetim balalardy qoldaý, balalar dárigerlik mekemelerin jabdyqtaý, kásipker áıelderdi tegin oqytý jáne basqa da mańyzdy sharalar uıymdastyryldy», dedi ol. Budan keıin Joǵarǵy sot, Bas prokýratýra, Ishki ister mı­nıstr­ligi, Densaýlyq saqtaý jáne áleý­mettik damý mınıstrligi ókil­deriniń «Áıelderge qatysty kemsi­tý­shiliktiń barlyq nysandaryn joıý týraly» tujyrymdamany júze­ge asyrý, sondaı-aq, Jambyl jáne Batys Qazaqstan oblystary ákim­dikteriniń Qazaqstan Respýblı­kasynda 2006-2016 jyldarǵa ar­nalǵan Genderlik teńdik strategııa­syn oryndaý jónin­degi aqparattary tyńdaldy. Atalǵan aqparattar boıynsha, elimizde áıelderdiń quqyqtary men múmkindikterin keńeıtý isi du­rys jolǵa qoıylǵan. Bul másele­de Qazaqstan Dúnıejúzilik ekono­mı­kalyq forýmnyń jahandyq reı­tınginde 47-orynǵa ıe bolyp otyr. Sondaı-aq, jıynda atap ótil­gendeı, Ulttyq komıssııaǵa ádil tóre­likke qol jetkize almaı júrgen áıelderden shaǵymdar jıi túsýde. Mysaly, 2015 jyly sottarǵa tús­ken qylmystyq ister boıynsha já­bir­­­lenýshilerdiń 43,1 paıyzy áıel­der men balalarǵa tıesili bolypty. Sonymen birge, otyrysta elimizde turmystyq zorlyq-zom­by­lyqty azaıtýǵa baǵyttalǵan naqty sharalar qabyldanyp otyrǵany, quqyq buzýshylarǵa yqpal etýdiń nátıjeli tásili zańdyq turǵyda engizilgeni, quqyq buzýshylarmen profılaktıkalyq áńgime júrgizý, qorǵaý uıǵarymdaryn shyǵarý jolǵa qoıylǵany sóz boldy. Buǵan qosa, jıynda sot aldynda quqyq buzýshylardyń tártibine erekshe talaptar qoıý ókilettigi berilgeni, «Turmystyq zorlyq-zombylyqtyń aldyn alý týraly» Zańdy qabyl­daǵan kezden beri ishki ister organdary qyzmetkerleriniń aralasýymen 206 myńnan astam qorǵaý uı­ǵarymy shyǵarylǵany, sottar tarapynan quqyq buzýshylardyń tártibine qatysty 22,5 myń erekshe talaptar qoıylǵany aıtyldy. О́z kezeginde Densaýlyq saq­taý jáne áleýmettik damý mınıs­tr­liginiń ókili «Jumyspen qamtýdyń jol kartasy-2020» baǵdarlamasy sheń­berinde áıelderdi jumysqa or­na­lastyrýǵa qatysty qabyl­danyp jatqan is-sharalar týraly máli­met berdi. Bul málimetke qara­ǵanda, qa­zirgi tańda áleýmettik keli­sim­shartqa 74,8 myń áıel qol qoı­ǵan. Olardyń 46,8 paıyzy aýyl tur­ǵyndary kórinedi. Sonymen qatar, áıel­­derge aýyr júk kóterý men ony qoz­ǵaýdy shekteý normalary qa­ras­­ty­rylǵan 287 jumys tizimi beki­tilipti. Otyrysta Memleket basshy­sy­nyń tapsyrmasy boıynsha túzilgen Qazaqstan Respýblıkasynyń 2030 jyldarǵa deıingi otbasylyq jáne genderlik saıasatynyń tujyrym­dama jobasynyń tusaýkeseri ótki­zildi. Aı­ta keteıik, bul tujy­rym­dama qa­zirgi álemniń naqty erek­shelikterin eskere otyryp, elimizde otbasylyq jáne genderlik saıasatty jańa sapaly deńgeıge kóterýge baǵyttalǵan. Jıyn sońynda otyrysty qo­ry­tyndylaǵan G.Ábdiqalyqova qaralǵan máseleler boıynsha memlekettik organdarǵa tıisti tapsyrmalar berdi. Joldybaı BAZAR, «Egemen Qazaqstan»