Áıgili «Parıj-Dakar» rallı-marafony 36 jyldyń ishinde birde-bir ret qaıǵyly oqıǵasyz ótken emes. Al bıyl 6-márte márege jetken «Jibek joly» halyqaralyq rallı-marafonynda kisi ólimi bolǵan joq. Ortalyq kommýnıkasııalar qyzmetinde ótken brıfıngte otandyq avtomarafonshy Artýr Ardavıchýs osylaı dedi.
Artýr Ardavıchýstiń aıtýynsha, eki marafonnyń qaısysy qıyn degen saýalǵa jaýap berý qıyn.
— «Jibek jolynyń» trekterimen de oınaýǵa bolmaıdy. Tabıǵaty ádemi, jaıqalyp turǵan jerlerdiń ózinde shóptiń astynda kózge kórinbeıtin qoıtastar tolyp jatýy múmkin. Jańbyrdan keıin taý-tasty jerleri óte taıǵaq bolyp keledi. Qysqasy, ekeýiniń de qaýipti jaqtary kóp. Biraq, «Jibek joly» rallı-marafonynda ázirge qaıǵyly oqıǵa bolmaǵany qýantady. Sebebi, sportshylardyń ómirin saqtap qalý jaǵy jaqsy oılastyrylǵan, – deıdi ol.
Máskeýden shyǵyp, Tatarstan men Bashqurtsanǵa soǵyp, Qazaqstannyń terrıtorııasy arqyly ótip, Beıjińde márege jetken marafon álemdegi eń qashyq rallı-marafon sanalatynyn aıta ketý kerek. Bıyl jol talǵamaıtyn kólikter arasynda áıgili fransýz Sırıl Depreniń ekıpajy birinshi kelse, júk kólikteri arasynda reseılik Aırat Mardeevtiń ekıpajy jeńimpaz atandy. «Astana Motorsports» komandasynyń múshesi Artýr Ardavıchýstiń ekıpajy jarys qorytyndysy boıynsha 5-orynǵa taban tiredi.
Ańyzǵa aınalǵan «Parıj-Dakar» kópkúndiginiń ózi 9 300 shaqyrym bolsa, «Jibek jolynyń» qashyqtyǵy 10 700 shaqyrymǵa teń. Bıyl jarysqa álemniń 39 elinen 92 júk talǵamaıtyn kólik pen 24 júk kóligi qatysqan bolatyn. Olardyń arasynda buǵan deıin «Davar» rallı-marafonynda birneshe márte top jarǵan Sebasten Lıob, Stefan Petronsel, Sırıl Depre syndy juldyzdardyń bolýy bul jarystyń bedelin arttyra tústi.
Arnur ASQAROV