О́tken jyly Shotlandııanyń Glazgo qalasynda ótken múmkindigi shekteýli sportshylar arasyndaǵy júzýden álem chempıonatynda qos qola júldege qol jetkizgen Zúlfııa Ǵabıdýllınany Jambyl oblysynyń ákimi Kárim Kókirekbaev qabyldap, qurmet kórsetti. Sonda sportshynyń jeke bapkeri Sattar Dúısembaev: «Alda Paralımpıada oıyndary kele jatyr. Alla qalasa, memlekettiń mereıin asyratyn dodada el namysyn bıikten kórsetip, álem chempıonatynda aldymyzdy oraǵan Nıderland sportshysynan ese qaıtaryp, tuǵyrdyń eń bıik satysynan kórinýdi kózdep otyrmyz», degen edi.
Shynynda Zúlfııanyń alar asýy asqaq eken. Ol Rıo-de-Janeırodaǵy HV jazǵy Paralımpıada oıyndarynda 100 metr qashyqtyqqa erkin júzýde el qorjynyna altyn júlde salyp, osy jeńisimen medaldar soqpaǵyn salyp berdi. Alty dúrkin álem chempıony Paralımpııalyq oıyndarda jańa álem rekordyn jańartty.
Taǵdyry Zúlfııaǵa alty jasynan tósekke tańylýdy jazdy. Alaıda, bul onyń ózin-ózi udaıy jetildirýine kedergi bola almady. Ol sýda júzý sportymen aınalysyp, ómirden laıyqty ornyn taba bildi. Respýblıkalyq múgedek sportshylar birinshilikterinde júldeger atanýy úlken sportqa degen qulshynysyn arttyra túsken. Ol úshin osydan 12 jyl buryn Olımpıadaǵa qatysý basty arman boldy. Armandar oryndalady eken. Qazaqstanǵa eńbek sińirgen jattyqtyrýshy Sattar Dúısembaevtyń qol astynda turaqty túrde jattyǵý kóp uzamaı óz nátıjesin bere bastady. Bar-joǵy 8 jyl ishinde olımpııalyq normatıvti oryndap, Londonda ótken paralımpııalyq oıyndarǵa qatysý mártebesine de qol jetkizdi. Oǵan buıyrǵany 12-oryn boldy. О́kinishtisi, onyń múmkindigi múgedektik sanaty boıynsha durys belgilenbeýinen ózinen bir synyp joǵary qarsylaspen básekege túsýine týra kelgen edi.
Bir jyldan keıin Kanadanyń Monreal qalasynda ótken álem birinshiliginde jetken nátıjesi onyń ómirine úlken betburys ákeldi. Bul synda Zúlfııa 50 metrlik qashyqtyqqa aldyn ala erkin júzýden áıelder arasynda S3 klasynda álem rekordyna qol jetkizdi. Ol 0:47.40 sekýndtyq ýaqytty kórsetti. Buǵan deıin Qytaı sportshysy osy qashyqtyqty 0:47.79 sekýndta júzip ótken-di. Sońǵy synda 0:47.79 sekýndtyq kórsetkishpen 2-oryndy jeńip aldy. Al qola júldege 50 metr qashyqtyqqa shalqalaı júzýde ıe boldy.
Odan keıin Staskanal (Gollandııa) qalasynda ótken dúnıejúzilik múgedekter oıyndarynda 4 altyn medal alyp, 3 álem rekordyn jańartty. Sport jáne dene shynyqtyrý isteri agenttigi uıymdastyrǵan «Úzdik sportshy-2013» saltanatty is-sharasynda «Jeńiske umtylys» atalymyn ıelengeni de bar. Onyń aldynda Shardj qalasynda (BAÁ) júzýden múgedekter arasynda ótken dúnıejúzilik oıyndarda top jardy. Ońtústik Koreıanyń Inchhon qalasynda jalaýyn jelbiretken Azııa Paralımpııalyq oıyndarynda da osy bıiginen tómendegen joq. Ol úshin byltyrǵy jyl da tabyssyz bolǵan joq, joǵaryda jazǵanymyzdaı, Glazgo (Shotlandııa) qalasynda ótken álem birinshiliginen eki birdeı qola medal oljalap qaıtty. Bıyldyń ózinde «Eındhoven kýbogi» halyqaralyq jarysy men Germanııa ashyq chempıonatynyń jeńimpazy atanyp úlgergen edi.
Qazirgi tańda Zúlfııa Ǵabıdýllına «Dos Taraz» qoǵamdyq birlestiginiń atqarýshy dırektory bolyp qyzmet etedi. Ujymmen til tabysa biletindigimen, ashyqtyǵymen, oryndaýshylyq qabiletiniń joǵarylyǵymen abyroı-syıǵa da bólenýde. Alǵa qoıǵan maqsaty úlken, eńbeksúıgish jan. Ol sportta da, ómirde de jeńimpaz!
Keshe Zúlfııa Ǵabıdýllınany jambyldyqtar Tarazdyń áýejaıynda qushaq jaıa qarsy aldy. Alys elden «altyn» arqalap kelgen jeńimpazdy Jambyl oblysynyń ákimi Kárim Kókirekbaev quttyqtap, aldaǵy ýaqytta oblys ortalyǵynan záýlim úı salyp berýge ýáde berdi. Al «Halyq bankiniń» jergilikti fılıaly osy úıdiń kórimdigi retinde 3 mln. teńgeniń sertıfıkatyn tabys etti. Qazaqstannyń eńbek sińirgen jattyqtyrýshysy Sattar Beısembaevqa 2 mln. teńgeniń sertıfıkaty tapsyryldy.
Oralhan DÁÝIT,
«Egemen Qazaqstan»
Jambyl oblysy