Almatyda Tuńǵysh Prezıdent qorynyń muryndyq bolýymen «Aman keleshek» atty jasóspirimderdiń mádenı-sporttyq festıvali ótti.
Tórt myńǵa jýyq mektep oqýshysy osymen úshinshi jyl bir ortalyqqa jınalyp, salamatty ómir salty týraly áńgime men ádemi oıyn-saýyqqa kenelip qaıtty.
«Barlyq bala úshin kúz aıy tosyn syı men merekege toly ǵoı. Bizdiń ótkizip otyrǵan sharamyz da oqýshylardyń ómirine serpin beretin, aınala qorshaǵan ortaǵa degen qushtarlyqty oıatatyn dástúrli festıval. Ásirese, jas urpaqtyń deni saý bolyp ósýi búgingi qoǵamnyń basty mindeti. Balalardy sportqa baýlý men salamatty ómir saltyn súıýge úıretý úshin qoldan kelgenniń barlyǵyn jasaýymyz kerek. Bizdiń sharamyz oqyp, úırený baǵytynda jáne ár balanyń sporttyq qabiletin shyńdaýyna jol ashady» deıdi Tuńǵysh Prezıdent qorynyń atqarýshy dırektory Saǵyndyq Nurahanov.
«Aman keleshek» festıvali jyl saıyn jańa býyn oqýshylardyń qatysýymen qyzyqty ótip, jalǵasýda eken. Uıymdastyrýshylar bıyl jasóspirimderge tosyn syı jasap, sharaǵa elimizdiń belgili sport sheberlerin shaqyrypty. Osy kúni Olımpıada jáne álem chempıondarynyń qolyn alǵan oqýshylar shattyqqa keneldi. Festıvalde Vasılıı Jırov, Iýrıı Melnıchenko, Ilıa Ilın, Darıǵa Shákimova, Maqsut Jumaev, Nazym Qyzaıbaı, Bolat Jumadilov sııaqty maıtalmandar jas sportshylarǵa aqyl-keńes berip, olardyń ónerin tamashalady.
Qalmahanbet MUQAMETQALI,
«Egemen Qazaqstan»
ALMATY