Daqyl mol, dıqan mereıli

Otyrar shóleıtti jer. Shóleıtti jerdiń qaýyny dámdi bolady. Osyny jaqsy biletin Reseı kásipkerleri torlama qaýyn pisken kezde kún-tún júrip osynda keledi. Jaqynda Otyrar aýdanynyń ákimi Erlan Aıtahanov Maıaqum, Baltakól aýyldyq ok­rýg­terine baryp, osyndaǵy atqarylyp jat­qan jumystardyń barysymen tanysyp, dıqandarmen júzdesti. Syr jaǵalap qon­­ǵan aýyldardyń jaǵdaıy jaman emes. Halqymyzda «kóktemniń ár kúni jylǵa azyq» degen qanatty sóz bar. Erte qamdanǵan dı­qan­dar qońyr kúzde «qazan aýzy joǵary» dep otyr. «Otyrar agroónimderi» kooperatıvine osy aýyldarda «Serikbaı-B», «Meıirbek LTD» jáne «Úsenov-N» seriktestikteri ki­rip, ónim­di jumys jasaýda. 100 gektar alqapqa «Jıenbaı» sortty qaýyn, 130 gektarǵa jońyshqa, 100 gektarǵa júgeri ekken dıqandar artyq ónimderdi qaı­da ótkizemdi oılaı bermeıdi. Sonaý Sankt-Peterbýrg, Más­keý­den at ary­­typ shyqqan reseılik alar­mandar bul jer­diń jaǵdaıyn jaqsy biledi. Arada alys-beris bar. Pisken baý-baqsha ónimderin al­qap basynan artyp áketedi. – Munyń bári Memlekettik qamqor­lyqtyń arqasynda múmkin bolyp jatyr, – deı­di aýdan ákimi. – Buryndary dı­­qan­­­darymyzdyń jeke-dara jasaǵan jumystary ónbeı, kóbine eńbegi esh bolyp jatatyn. Shaǵyn sharýashylyqtar iri­lenip, kooperatıvke birikkennen keıin arzan janarmaıdan tyńaıtqyshqa deıin tıimdi baǵamen alynatyn boldy. Sonymen qatar, baqsha daqyldaryna memleket tarapynan beriletin sýbsıdııa túsetin paıdany eseleýde. Sondyqtan, kásipkerlerimiz Elbasynyń aýyl sharýashylyǵyna jasaǵan qamqorlyǵyna rahmet aıtady. Rasynda, kúni keshe sharasyzdyqtan sharýasynyń retin keltire almaı, qula dúzde qańbaq toqtaı almaǵan alqap búginde aýyldyń búıirin shyǵaryp otyr. Dıqandar tamshylatyp sýarý tehnologııasy boıynsha 104 gektar jerge pııaz egip, gektarynan 60 tonnaǵa deıin ónim jınap alýda. Munymen toqmeıilsimeı, 50 gektar jerge tamshylatyp sýarý arqyly kúzdik pııaz egipti. Aýyl – qazaqtyń altyn besigi, ortaımaıtyn qutty qazany, molshylyq mekeni. Aýyl túlese, qalanyń berekesi kiredi. Kúni keshe ebelek jortqan qula dúz eńbektiń arqasynda yrysy tasyp jatyr.  Baqtııar TAIJAN, «Egemen Qazaqstan» Ońtústik Qazaqstan oblysy