О́tken jyldyń osy merziminde bastalǵan fotobaıqaýdyń 71 qatysýshysy kásibı mamandardyń talqysyna barlyǵy 560 jumys tapsyrǵan eken. Shynaıy sheberlerden qurylǵan qazylar alqasy fotojýrnalıster men áýesqoı fotosheberlerdiń mańdaı terin tógip atqarǵan jumystaryn tarazylaı kele naǵyz jeńimpazdardyń esimin atady. Qamtý aýqymy keń baıqaýda negizinen fotoobektıvke ilingen elimizdiń ásem tabıǵaty, tarıhı eskertkishteri men halqymyzdyń salt-dástúrine baılanysty qas qaǵym sáttik qaltqysyz kórinister saralandy.
Baıqaýdyń bas júldesin – birinshi oryndy «Dostyq shoqysy» atty sýreti úshin óskemendik Mereı Qaınaruly jeńip aldy. Ekinshi oryndy «Teńge ilý» fotosýreti úshin tarazdyq Almaz Orman, úshinshi oryndy «Taýdan aqqan tas bulaq» shyǵarmasy úshin almatylyq Tileýbek Rahymjan ıelenip, arnaýly syılyqtarmen marapattaldy. Jeńimpazdarǵa – Pillips televızory, Aser noýtbýgi jáne Nikon fotoapparaty berildi. Budan basqa barlyǵy bes yntalandyrý syılyǵynyń jeńimpazdary da fotobaıqaý qorytyndysyna oraı marapat aldy.
Marapattaý saltanatynyń aldynda Qazaqstan fotojýrnalıstıkasynyń aıtýly sheberi, ardager fototilshi Nurmanbet Qızatovqa «Fotoóner qaıratkeri» medali tapsyryldy. Sondaı-aq Qazaqstan «Fotoóner» qoǵamdyq birlestigi dúnıeden ótken Nurǵoja Jubanov, Qaırat Mustafın, Sıez Básibekov, Saılaý Pernebaev, Rahymbaı Hanaly sııaqty esimderi elge tanymal bolǵan baspasóz fotosheberleriniń otbasylaryna arnaıy syılyq-eskertkishter tapsyrdy.
Baıqaýdyń demeýshileri – «Bank RBK» AQ, National Geographic Qazaqstan jáne Nikon Qazaqstan kompanııalary ekenin de eske sala ketkendi jón sanadyq.
Talǵat SÚIINBAI,
«Egemen Qazaqstan»
ALMATY
Sýretti túsirgen Nurmanbet QIZATOV