Parlament Májilisinde Túrkitildes elder Parlamenttik Assambleıasynyń (TúrkPA) Áleýmettik-mádenı salasyndaǵy beıindik komıtetteriniń birlesken úshinshi otyrysy ótti. Otyrys Astanada ótken Ǵylym, tehnologııa jáne ınnovasııa jónindegi Azııa parlamentaralyq forýmy sheńberinde uıymdastyryldy.
Jıynǵa Qazaqstan, Ázerbaıjan, Qyrǵyzstan jáne Túrkııa parlamentshileri, Halyqaralyq Túrki Akademııasynyń, elordadaǵy Ulttyq mýzeıdiń basshylary qatysty. Jıynǵa tóraǵalyq etken Parlament Májilisiniń depýtaty Saýytbek Abdrahmanov: «Elbasymyz BUU-nyń Bas Assambleıasynyń sessııasynda álemniń ekonomıkalyq damýy úshin Azııa elderiniń yqpaly zor ekenine erekshe nazar aýdardy. Sondyqtan, qazir álemdegi bilikti sarapshylar XXI ǵasyrdy «Azııa ǵasyry» bolady dep boljaıdy. Demek, biz jańa zaman alǵa jańa mindetter qoıyp otyrǵan kezeńde túrktildes elderdiń yntymaǵynyń mańyzy erekshe ekenin qaıtalap aıta alamyz. Bir joly Túrkııaǵa barǵanymyzda «Qudaı qosqandy adam ajyrata almaıdy» degen sózdi aıtqanymyz bar. Sizder men bizderdi Qudaı qosqan. Sebebi, bárimizdiń taǵdyrymyz da, tarıhymyz ortaq», – dedi S. Abdrahmanov.
Jıynda sóz alǵan Halyqaralyq Túrki Akademııasynyń prezıdenti osy uıym túrki álemindegi ǵylymı ıntegrasııaǵa uıytqy bolyp júrgeni, bul rette TúrkPa-men birlese kóptegen is-shara atqarylǵany týraly baıandap berdi.
Al Parlament Májilisiniń depýtaty Bekbolat Tileýhan Qazaqstannyń qaı elmen de saıası baılanysy berik ekenin, biraq baýyrlas aǵaıynnyń jóni qashan da bólek bolatynyn jetkizdi. «Túrkitildes elderdiń Parlamenttik Assambleıasy aıasynda ózara baılanysymyzdy jandandyryp, elderimizdiń áleýmettik-mádenı jaǵynan damýyna úles qosý – bul bárimizge ortaq sharýa», – dese, Ázerbaıjan Respýblıkasy Mıllı Medjlısi Ǵylym jáne bilim jónindegi Turaqty komıteti tóraǵasynyń orynbasary Bahtııar Alıev TúrkPa-nyń kezdeısoq qurylmaǵanyn, onyń negiziniń qalanýyna uzaq ýaqyt ketkenin atap ótti. «Árıne, túrli qıyndyqty bastan ótkerdik, biraq búginde biz áriptestiktiń jańa belesin baǵyndyrdyq», – dedi ol.
Láıla EDILQYZY,
«Egemen Qazaqstan»