Táýelsizdiktiń 25 jyldyǵyna oraı TÚRKSOI-dyń uıymdastyrýymen túrik halyqtarynyń ónerpazdarynan quralǵan halyq aspaptar orkestri taldyqorǵandyqtarǵa tamasha tartý jasady.
Dombyra, balama, syrnaı, kaval, qyl-qobyz, saz syrnaı, morın-hýýr, rýbab, topshýr sııaqty túrli aspaptarynan tógilgen birde muńdy, birde asqaq, birde baıaý, birde alasapyran ún I. Jansúgirov atyndaǵy Mádenıet saraıyna jınalǵan qaýymdy sonaý erte ǵasyrdaǵy tarıh qoınaýyna jetelep áketti.
Konsert baýyrlas halyqtardyń tili, túsi, tarıhy ǵana emes, mýzakasynyń da ortaqtyǵy jaıly oıǵa jeteledi. Rasynda ózi abyz, ózi kúıshi, ózi baqsy ári oıshyl Qorqyt babamyzdyń qolyndaǵy qobyzdan týǵan saryndar túrkilik mýzyka tarıhyndaǵy bárimizge ortaq qundylyq emes pe edi? Qurmanǵazynyń «Adaı» kúıine, Kenenniń ánine kórsetilgen ystyq yqylasty aıtpaǵanda, Saha respýblıkasynan kelgen Iýlııana Krıvoshapkınanyń shań qobyzynyń únine, qyrǵyz ónerpazdarynyń qomyzben tókken týyndylaryna, túrik, ájirbaıjan halyq ánderine, jalpy jıyrmaǵa tarta nómirdiń qaı-qaısysyna da kórermen tik turyp qol soqty.
Almaty oblysynyń ákimi Amandyq Batalov konsert sońynda TÚRKSOI uıymynyń hatshysy Dúısen Qaseıinovke, óner ujymyna osyndaı ulaǵaty mol sharany Jetisýdyń kindik qalasynan bastaǵandaryna rızashylyǵyn bildirip, shyǵarmashylyq tabys tiledi.
Arman Nurahmetulynyń rejısserligimen, Marat Jalbırovtiń dırıjerligimen qoıylǵan konsert jaı ǵana án aıtylyp, kúı tartylǵan qatardaǵy oıyn-saýyqtyń biri bolǵan joq. Tamyry bir halyqtardy burynǵydan da jaqyndastyra, baýyrlastyǵyn bekemdeı túsken, anshlagpen ótken rýhanı demalys boldy.
Saǵynysh Namazshamova, Taldyqorǵan