Keshe Investısııalar jáne damý mınıstri Jeńis Qasymbek baspasóz máslıhatyn ótkizip, ındýstrııalyq-ınnovasııalyq damý jáne «Nurly Jol» baǵdarlamalarynyń júzege asyrylý barysy, sondaı-aq, mınıstrlikte bıylǵy jyldyń 8 aıynda atqarylǵan jumystardyń jaı-kúıi týraly jýrnalısterge baıandap berdi.
Mınıstrdiń aıtýynsha, ındýstrııalyq-ınnovasııalyq damý baǵdarlamasynyń aıasynda elimizde ónerkásiptik ınfraqurylymdar úshin qajetti máseleler tolyǵymen sheshildi deýge bolady. Elimizde avtoónerkásip, medısınalyq tehnıka, tıtan ónerkásibi, kún, jel energetıkasy syndy óńdeý ónerkásibiniń 26 salasy qalyptasqan. Júk vagony men jolaýshylar vagony, elektrovoz, jeńil avtokólik pen avtobýs, transformator, rentgen qurylǵylary syndy buryn-sońdy shyǵarylmaǵan 500-den astam jańa ónim shyǵarý jolǵa qoıylǵan.
– Eń bastysy, osy jańa óndiristerdiń arqasynda sapaly jańa jumys oryndary quryldy. Bes jyldyń ishinde Indýstrııalandyrý kartasy jobalaryn qosa alǵanda 160 myńnan astam jumys orny ashyldy. О́tken jyl men bıylǵy jyldyń 8 aıynda shamamen 14 myńnan astam jumys orny ashyldy,– dedi Jeńis Qasymbek.
Jahan ekonomıkasyndaǵy kúrdeli ahýalǵa qaramastan, mınıstrlik ındýstrııalandyrý saıasatyn ret-retimen júrgize berýge nıetti. Sol úshin ónimdilik pen eksportqa beıimdilik máselesin basty kórsetkish retinde qarastyryp, 5 saladaǵy mańyzdy degen 8 sektorǵa basymdyq berip otyr. Atap aıtar bolsaq, bul segiz salaǵa qara jáne tústi metallýrgııa, munaı óńdeý, munaı hımııasy men agrohımııa, azyq-túlik ónimderin óndirý, avtobomıl qurastyrý jáne elektr-
tehnıkalyq mashına jasaý jatady.
Osy segiz sektor memleket tarapynan naqty qoldaýǵa ıe deýge bolady. Sebebi, osy sektorlardaǵy naqty jobalar úshin tıisti ınfraqurylym, uzaq merzimdi lızıng pen Qazaqstannyń Damý banki arqyly nesıeleý syndy jaǵdaılar jasalýda.
Jeńis Qasymbek óz baıandamasynda ǵarysh salasyn damytý isine toqtalyp ótti. Onyń aıtýynsha, búgingi tańda «KazSat-2» men «KazSat-3» spýtnıkteri elimizdegi baılanys jáne habar taratýmen aınalysatyn 15 operatorǵa, basqa da uıymdarǵa sapaly qyzmet kórsetip otyr. Ǵarysh salasyn damytýda Qazaqstannyń basty artyqshylyqtarynyń biri «Baıqońyr» ǵarysh aılaǵy deýge bolady. Elimizdiń ekologııasyna keri áser etetin jaıttardy azaıtý úshin, bıyldan bastap osy ǵarysh aılaǵynan «Proton» zymyran-ushyrǵyshtaryn ushyrý azaıtylmaq.
– Qazir reseılik bazada «Báıterek» ǵaryshtyq zymyran keshenin qurý máselesi qarastyrylyp jatyr. Onda kerosın jáne suıyq ottegi syndy ekologııalyq jaǵynan qaýipsiz komponentteri bar otyndar qoldanylady, – dedi mınıstr bul týraly.
Elimizde týrızmniń damýy 2020 jylǵa deıingi Týrıstik salany damytý tujyrymdamasyna saı júrgizilýde. 2017 jyldan bastap Qazaqstan men Ekonomıkalyq yntymaqtastyq jáne damý uıymy elderi arasynda, sondaı-aq ekonomıkasy damyǵan, saıası ahýaly turaqty basqa da memlekettermen arada vızasyz qatynas jolǵa qoıylmaq. Osylaısha, vızasyz tártip engizilgen elderdiń qatary 48-ge jetip, týrısterdiń legi kóbeıe túsýge tıis. Al EKSPO-2017 halyqaralyq kórmesi ótkennen keıingi kezeńde Reseı, Túrkııa, Italııa, Germanııa, Nıderland, AQSh jáne Ulybrıtanııa syndy elderden keletin týrısterdiń qatary odan ári kóbeıedi dep josparlanyp otyr.
Týrısterdi qabyldaýǵa qajetti ınfraqurylym da sońǵy jyldary aıtarlyqtaı damyp keledi deýge negiz bar. Máselen, osydan 10 jyl buryn elimizde bar bolǵany 871 qonaqúı bolsa, qazir 2 500-ge jýyqtaıdy eken. О́tken jyly qonaqúıler bas-aıaǵy 73 mıllıard teńgege qyzmet kórsetken. EKSPO kórmesine oraı, elimizdiń eń kórikti, qonaqjaı degen óńirlerin qamtıtyn 73 túrli týrıstik marshrýt bekitilip, olardyń kólik ınfraqurylymyn jetildirý jumystary qolǵa alynǵan.
Investısııalar jáne damý mınıstri jýrnalısterge kólik ınfraqurylymyn jetildirý, geologııa men jer qoınaýyn paıdalaný, ınnovasııalyq damý syndy ekonomıkanyń eń mańyzdy salalarynda atqarylyp jatqan jumystar barysyn ortaǵa salyp, jýrnalısterdiń saýaldaryna jaýap berdi.
Arnur ASQAR,
«Egemen Qazaqstan»