Parlament Senatynyń Halyqaralyq qatynastar, qorǵanys jáne qaýipsizdik komıtetiniń kóshpeli otyrysy ótti. Otyrysqa senator, atalǵan komıtet tóraıymy Darıǵa Nazarbaeva jetekshilik etti.
Basqosýda qoldanystaǵy «Azamattyq qorǵanys týraly» Zańnyń qyzmetin jetildirýge qatysty sóz qozǵaldy.
– Bul zań 2011 jyly tótenshe jaǵdaıǵa qarsy is-qımyl salasyndaǵy alty zańdy biriktirý arqyly qabyldanǵan bolatyn. Sol ýaqyttan beri qujat azamattyq qorǵanys salasynyń jumysyn retteýshi qural retinde qyzmet etip keledi. Zaman ozyp, adamnyń ómir súrý jaǵdaıy ońalǵan saıyn tótenshe jaǵdaılardyń aldyn alýǵa qatysty erejeler de damyp, jetildirilip otyrýy kerek. Qoǵamda adam ómirinen qundy dúnıe bolmaýy tıis. Al azamattyq qorǵanys degenimiz, adam balasynyń ómirin saqtandyrýǵa baǵyttalǵan jaýapkershilik. Sol sebepten qoldanystaǵy zańnyń jumys isteý tetikteri men qyzmet aıasyn saraptap, tótenshe jaǵdaı salasyndaǵy máselelerdi sheshýge kirisýimiz kerek, – dedi jıynda D.Nazarbaeva.
Kóshpeli otyrystyń Almatyda ótkizilýi de tegin emes. Bıik taý baýraıy men sarqyraǵan ózen ańǵaryna qonys tepken qala – elimiz boıynsha tótenshe jaǵdaı qaýpi aldymen tónetin meken. Ári Jetisý jeriniń seısmıkalyq belsendiligi de óte joǵary. Derek boıynsha, Alataýdyń qos qaptalynda ár kún saıyn jerasty terbelisi tirkeledi eken. Demek, Almaty turǵyndary úshin tótenshe jaǵdaı kezindegi is-áreketterdiń mańyzdylyǵy joǵary. Osy jıynda megapolıstiń azamattyq qorǵanys salasynyń daıyndyǵy tarazyǵa salynyp, jaýapty tulǵalardyń esepteri tyńdaldy.
Sondaı-aq, senatorlarmen kezdesýde ot qaýpi joǵary qalalar men eldi mekenderdiń qaýipsizdigin tolyqtaı qamtamasyz etý úshin áli de 167 órt sóndirý deposyn salý qajettigi sóz boldy. Ishki ister mınıstriniń orynbasary Iýrıı Ilınniń məlimdeýinshe, elimizde órt qaýpinen qorǵaný maqsatynda sońǵy jyldary 100-den astam arnaıy beketter ashylǵan. Qazir el aýmaǵynda 423 órt sóndirý bólimsheleri jumys jasaıdy. Alaıda, tilsiz jaýmen kúreste arnaıy mamandar men jabdyqtalǵan tehnıka jetispeýshiligi kún tártibinde tur.
Aıtpaqshy, turǵyndardyń azamattyq qorǵanys salasy boıynsha jedel jelilerge jıi habarlasatyny baıqalǵan. Máselen, ótken aı aralyǵynda «112» jelisine 3 638 799 ret telefon qońyraýy tirkelipti. Al Ishki ister mınıstrliginiń tótenshe jaǵdaı komıtetiniń qutqarý bólimsheleri 6,5 myń adamdy túrli áreketterden qutqaryp, 40 000 adamdy evakýasııalaǵan. Taǵy 5000 adamǵa apat jaǵdaıynda medısınalyq kómek kórsetilip, 11 ret shuǵyl operasııa jasalǵan.
Qalmahanbet MUQAMETQALI,
«Egemen Qazaqstan»
ALMATY