Aýdanaralyq dıspanser medısınalyq qyzmetpen tórt aýdannyń turǵyndaryn qamtıtyn bolady

Bıylǵy Joldaýda qazaq­stan­­dyqtardyń densaýlyǵyn jaq­sartýǵa qajetti sharalar­dyń bári jasalatyny, ol úshin elimizde qolaıly jaǵdaılar tý­ǵyzylǵany atap kórsetilgeni málim. Sala birtutas ulttyq den­saýlyq saqtaý júıesine kó­ship, jańa áleýmettik jobalar júzege asyryldy. Dári-dár­mek­pen jabdyqtaý, densaýlyq saqtaý nysandaryn salý, zamanaýı qural-jabdyqtar ornatý baǵytynda da ózgerister kóp. Endigi mindet aýrýdyń aldyn alýǵa shyndap kirisý, bastapqy medısınalyq-sanıtarlyq járdemniń sapasyn arttyrý, profılaktıkalyq jumystardy saýatty uıymdastyrý bolyp tabylady. Jambyl aýdanynda «100 mektep, 100 aýrýhana» baǵ­darlamasy aıasynda 90 adam­dy qabyldaıtyn emhanasy bar 100 naýqasqa arnalǵan aýdan­ara­lyq týberkýlez dıspan­seri­niń paıdalanýǵa berilýi shalǵaı­daǵy aýyl turǵyndary úshin dá­rigerlik kómektiń qoljetimdiligin arttyra túseri anyq. Qyzyljar óńirinde týberkýlez qaterli aýrýlar tiziminde tur. Sońǵy kezderi  onymen syrqat­tan­ǵandar jáne qaıtys bol­ǵan­dar sanynyń kemigeni baıqalady. Ftızıatr dárigerler mundaı oń qubylysty adam densaýlyǵyna úlken qaýip tóndiretin aýrý­lar­dyń jolyn kesýde memlekettik turǵydan úlken mán berilip, emdeý sharalarynyń keshendi júr­gizilýimen baılanystyrady. Kúr­de­li ahýal osylaısha birtindep eńserilip keledi. Aýdan ortalyǵy Presnov kentinde turǵyzylǵan eki qabatty medısınalyq ǵıma­rat­tyń qurylys jumystarymen «Lıra» JShS  aınalysty. 8700 sharshy metr aýmaqty alyp jat­qan mekemege respýblıkalyq qa­zy­nadan 1,5 mıllıard teńge quıy­lyp, 83 mıllıony medı­sı­nalyq qondyrǵylar, 48 mıl­lıony jum­saq jıhazdar alýǵa jum­saldy. Onyń ashylý saltanatyna oblys ákimi Serik Bilálov qa­ty­syp,  quttyqtaý sózinde  Jol­­­daý­dyń negizgi qaǵıdat­ta­ryn jı­nalǵandardyń esine saldy. Byltyr oblystyń den­saý­lyq saq­­taý salasyna 11,8 mıllıard teńge bólindi. Ny­san­dardy  qaı­ta qalpyna keltirýge 2,2 mıl­lıard teńge qaras­ty­ryldy. Jol­damamen kelgen 68 jas mamanǵa turǵyn úıler men kóterme aqy­lar berildi. Ne­gizgi densaýlyq saqtaý kór­setkishte­ri jaqsara túsýde, dedi aımaq basshysy. Sosyn ujymǵa «Jedel járdem» kóliginiń kiltin tabys etti.  Dıspanserdiń ishin ara­lap kórip, joǵary talap­tarǵa jaýap beretinine kóz jetkizdi. Ekinshi qabatta syrqat­tyń aýyr túrine shaldyq­qan naýqastar úshin bir, eki oryn­dy palatalar ornalasqan. Olar­dyń jabdyqtalýy da kóńil súı­sin­tedi. Dýsh, dárethana – bári ishinde. – Dıspanser 4 aýdannyń tur­ǵyndaryna qyzmet kórsetedi. Bu­dan tysqary naýqastarǵa qosym­sha  medısınalyq kómekter beriledi. Soǵan oraı  ÝDZ, tis dári­geri, taǵy basqa  shtattar qaras­ty­rylǵan. 100-den asa adam jumysqa ornalasty. Joǵary jáne arnaıy orta bilimdi medısına qyz­met­kerleri – 36. Zerthanamyz, fızıoterapııa, ókpe, júrek dimkástigin tez arada anyqtaıtyn sheteldik qon­dyrǵy-apparattar bar, – dedi áńgi­me­leskenimizde bas dáriger Gúlnar Qojanova. Onyń aıtýynsha,  týbdıspan­ser­diń qaramaǵyna kiretin aýdandar boı­ynsha 2009 jyly ókpe aýrýyn juq­tyrýshylar 153 bolsa, 2010 jyly 83 adam tirkelipti. Demek, jańa nysannyń boı kóterýi –  tyń baǵdarlardy  iske qosýǵa odan ári múm­kindik beredi degen sóz. Keı mamandar syrttan aldyrylypty. Olar jaıly baspanalarmen qam­ta­masyz etiletin bolady. Solar­dyń biri Aleksandra Omýtova oblys ortalyǵyndaǵy jyly or­nyn osynda aýystyrypty. Bas meıir­bıkeniń kelgenine esh ókin­beıtini kúlim qaqqan júzinen aı­qyn ańǵarylady. Gúlnar Qara­taı­qyzy da shaqyrtýmen kelgen. Ne kerek, el Táýelsizdiginiń 20 jyldyǵy qarsańynda  aýdan­ara­lyq týberkýlez dıspanseriniń qo­nys tebýi alys eldi meken tur­ǵyndary úshin úlken tartý boldy. О́mir ESQALI. Soltústik Qazaqstan oblysy, Jambyl aýdany.