Sheteldik BAQ ókilderimen kezdesti

Jaqynda Qazaqstan Respýblıkasy Ortalyq saılaý komıssııasynyń tóraǵasy Qýandyq Turǵanqulov Reseı Federasııasy men Belarýs Respýblıkasynyń buqaralyq aqparat quraldary ókilderimen kezdesti. Kezdesýde reseılik jáne belarýstik  BAQ ókilderi kezekten tys prezıdenttik saılaýdy taǵaıyndaýǵa, uıymdastyrýǵa jáne ótkizýge baılanysty qolǵa alynyp jatqan is-sharalarmen, sondaı-aq Qazaqstan Respýblıkasynyń saılaý zańnamasy men saılaý júıesiniń jalpy damý úderisterimen  keńirek tanysýǵa qazyǵýshylyq bildirdi. Ortsaılaýkom tóraǵasy sheteldik BAQ ókil­derin Ortalyq saılaý komıssııasynyń kezekten tys saılaýdy ázirleý jáne ótkizý boıynsha at­qaryp otyrǵan jumysymen, saılaý naýqanynyń negizgi kezeńderimen jáne 20 aqpan kúni aıaq­talǵan kandıdattardy usyný kezeńiniń qoryt­yn­dy­lary­men tanystyrdy. Sondaı-aq Qýandyq Tur­ǵan­qulov olardyń saılaýdyń quqyqtyq negizderine, táýelsiz Qazaqstannyń saılaý júıesiniń qalyp­tasý tarıhyna, Konstıtýsııa men «Saılaý týraly» Zańnyń eldegi eń joǵary laýazymnan úmitker­ler­ge qoıatyn talaptaryna, kezekten tys prezıdenttik saılaýdy uıymdastyrý men ót­kizýge bólingen bıýdjet qarajatynyń mól­sherine, saıası partııa­lar­dyń qyzmetine, Ortsaılaýkom men saılaý úderisine qatysýshylardyń buqara­lyq aqparat quraldarymen ózara árekettestigine, saılaý úde­risiniń aıqyndyǵyn qamtamasyz etýge, barlyq kan­dıdattardyń BAQ-tarǵa teń qol jetkizýin qamtamasyz etý tetikterine, saılaýdyń qory­tyn­dylaryn shyǵarý úderisine, kelip túsken aryzdar men shaǵymdardyń sanyna qatysty qoıǵan suraq­taryna jaýaptar qaıtardy. Jáne jýrnalısterdi elektoraldyq naýqanǵa halyqara­lyq baıqaýshy­lar­dyń qatysýy, qazaqstandyq jáne halyq­aralyq baıqaýshylardyń quqyqtary týraly habardar etti. Sheteldik jýrnalısterdiń saýaldaryna jaýap bere kelip, Q.Turǵanqulov saılaý naýqanynyń bas­ta­lýy­na oraı saıası partııalardyń belsendi­ligi­niń arta túskenin atap ótti. Olardyń barlyǵy derlik belsendi nasıhat jumysyn júrgizip, ózderiniń ókil­derin Ortalyq jáne aýmaqtyq saılaý komıs­sııa­larynyń quramyna joldaýdy, sondaı-aq saılaýdy baıqaýǵa qatysýdy kózdep otyr. Halyqaralyq uıymdardyń da saılaý­aralyq kezeńge qaraǵanda belsendiliginiń artyp otyrǵany baıqalady. Olar saılaý naýqany ke­zeńinde ártúrli oqytý baǵdar­lamalaryn iske asyrýǵa jáne saılaýshylar úshin baspa ónimderin taratýǵa umtylýda. Bul «Qazaq­stan Respýblıka­syndaǵy saılaý týraly» Konstı­týsııa­lyq zańǵa qaıshy keledi. Ortsaılaýkom bas­shy­sy mundaı baǵdarlamalardy elimizdiń saılaýdy uıym­das­tyrý­­shylarymen birlesip, tek saılaýlar araly­ǵyndaǵy kezeńde iske asyrýǵa bolatynyn basa aıtty. Kezdesýde Q.Turǵanqulov jýrnalısterdiń Syrt­q­y ister mınıstrligi janynda akkredıttelgen jýrnalıster retinde saılaý naýqany barysyn baıqaýǵa belsene qatysatynyna senimin bildirdi. Álısultan QULANBAI.