Qazirgi tańda oblystyń aýyl sharýashylyǵy salasynyń órkendeýine sharýashylyqtardyń usaqtyǵy keri áserin tıgizýde. Jambyl oblysynda 100 gektarǵa deıingi jer telimi bar sharýashylyqtardyń úlesi 70 paıyzdy quraıdy. Árıne, óńirde sharýashylyqtardy biriktirý, irilendirý jumysy nazardan tys qalǵan emes. Maıda bolǵan soń bul sharýashylyqtardyń sharýasy da, mashaqaty de shash-etekten. Ne nesıe ala almaıdy, ne memleket tarapynan beriletin jeńildikterdi paıdalana almaıdy.
Jaqynda Jambyl oblysynda sút klasterin damytý, sondaı-aq kooperatıvterge shaǵyn sharýashylyqtardy biriktirý maqsatynda jańazelandııalyq «Fonterra» jáne Danııalyq «Arla» baǵdarlamalary boıynsha Merki aýdanynda quramyna 42 sharýashylyq birikken «Merki ónimderi» óndiristik kooperatıvi quryldy.
Oblystyq aýyl sharýashylyǵy basqarmasy basshysynyń orynbasary Erkebulan Anabekovtiń aıtýyna qaraǵanda, aldaǵy ýaqytta bul óndiristik kooperatıv tóńireginde 70-200 basqa deıin asyl tuqymdy saýyn sıyry bar taýarly-sút fermalary qurylatyn bolady. Kooperatıv olardyń tóńiregindegi sút óndirýshilerdi, mal azyǵyn daıyndaýshylardy uıymdastyra otyryp, daıyn ónimdi ótkerý jumystarymen aınalysady. Bul maqsatta sút baǵytyndaǵy 1000 bas asyl tuqymdy iri qara malyn satyp alýdy qarjylandyratyn shaǵyn nesıe mekemesi de jumysyn bastady.
Oralhan DÁÝIT,
«Egemen Qazaqstan»
Jambyl oblysy