О́mir joly taqtaıdaı tegis bola bermeıtini bar. Taǵdyr talaıyńdy tap basyp boljaý da qıyn, aldyńnan ne kútip turǵanyn kim bilgen. Ásirese, jastyq shaqta bári kóńildegideı bolatynyna senimmen ómir súretiniń jasyryn emes. «Pandýs - OK» JShS dırektory Shahan Joldasbaevtyń armany bıik, bolashaǵyna úlken úmitpen qaraıtyn. Ol da el qatarly mektep bitirdi. Qazaq kólik jáne kommýnıkasııa akademııasyna túsip, keıin Q.Jubanov atyndaǵy Aqtóbe memlekettik ýnıversıtetine aýysyp, ınjener-mehanık mamandyǵyn alyp shyqty. «Spanjan» JShS-inde mamandyǵy boıynsha eńbek jolyn bastady. Áskerge de bardy. Odan kelgen soń Qorshaǵan ortany qorǵaý mınıstrliginde eńbek etti. Bir sózben aıtqanda armanshyl jastyń aıy ońynan týyp, alǵy kúnderge joba-josparlary da jarqyn bolatyn.
Joldastarymen Býrabaıǵa demalýǵa bara jatyp kólik apatyna ushyraǵan Shahan basyna mundaı aýyrtpalyq túsedi dep áste de oılaǵan emes. Jaqyn mańdaǵy Makınka aýylyndaǵy aýrýhanaǵa jetkizilgen onyń jaǵdaıy aýyr edi. Elordadan jedel jetken dárigerler bul jerde kúrdeli ota jasaýdyń múmkindigi joq ekenin aıtyp, reanomobılmen Astanaǵa ákelip, bir kúnnen keıin ota jasapty. Oryndyqqa otyrý muńǵa aınaldy, basyn kóterýge zar boldy. Mundaı qııamet-qaıymdy esh adamnyń basyna bermesin. Aq halatty asyl jandar men týǵandarynyń aıaly alaqany ǵana ilgeri kúnge úmit jibin jalǵady. Bir jyl tósekke tańylǵan jas jigit sonda da ómirge degen qushtarlyǵyn joǵaltpady. Novosibirdegi ońaltý ortalyǵyna eki-úsh ret bardy. Ondaǵy bilikti dárigerler otanyń óte sátti jasalǵanyn aıtyp kóńilin demedi, senimge qanat bitirdi.
– Eki jyldan keıin qolarbaǵa otyrýǵa múmkindigim kelgen soń baryp, Qytaıda emdelsem qaıtedi degen oı keldi. Qasym men qabaǵyma qaraıtyn qaryndasym Gúlshahan «Aqtóbe qalalyq sal aýrýlaryna shaldyqqan azamattardy qoldaý ortalyǵy» qoǵamdyq birlestiginiń tóraıymy Quralaı Báımenovaǵa jolyǵyp, aqyl-keńes alýǵa qol jetkizdim. Shyny kerek, ol kisi birlestikte jumys isteýge usynys berdi. Men densaýlyǵyma qaraı almaı qalamyn ba dep, biraz ýaqyt bas tarttym. Ekinshi bir kelgenimde: «Sen qysylma, kýrstastaryń da, joldastaryń da seniń halińdi biledi. Jumys isteseń kóńiliń bólinedi, qolarbaǵa tańylyp qalǵanyńa tómenshiktep, jasymaısyń», dedi. Sóıtip kompıýtermen jumys istep, «Iýtýb» saıt-arnasyn ashtym. Jobalar jasaýmen aınalystym. «Qala – meniń kózimmen» degen shaǵyn beınerolıkterdi shyǵaryp júrdim. Biz qaladaǵy mekemeler men uıymdardaǵy pandýs máselesine arnalǵan sharaǵa qatystyq. Sonda qurylys salasynyń jaýapty mamany bizdiń atap kórsetken kemshilikterimizdi moıyndamaı, bári saraptamadan ótken dep boı bermedi. Meniń oıyma «Ne stroıte dlıa nas, bez nas» degen ıdeıa keldi. Sóıtip ǵımarattarǵa pandýs ornatýmen aınalysýǵa bel býdym, – deıdi ol.
Árıne, bul sharýany bastap ketý oǵan ońaıǵa túsken joq. Osyndaı kezde tanysy Gúlnar Edigeevanyń usynysymen qolarbaǵa tańylǵan jas jigit osydan eki jyl buryn «Atameken-Startap» bıznes jobalar baıqaýyna qatysyp, «Altyn qyran» halyqaralyq korporatıvtik qaıyrymdylyq qory usynǵan 2 mıllıon teńge qaıtarymdy grantqa ıe bolady. Baıqaýǵa qatysqan 300-ge jýyq komandanyń ishinen tańdalǵandardyń qatarynda bolǵany kóńilge senim uıalatty. Onyń qasynda qurylys salasynda eńbek etetin qaryndasy Gúlshahan da júrdi. О́z isin bastaýǵa múmkindik alǵanyna qýandy. «Pandýs-OK» JShS- in tirketti. Shahannyń mundaı jobasyn júzege asyrýǵa oblystyq kásipkerler palatasy da qoldaý kórsetken. Pandýs qurylystarymen aınalysýǵa ruqsat beretin úshinshi sanatty lısenzııa alýǵa, býhgalterlik esep júrgizý, kelisimsharttar jasasý máselesinde de kómek qoldaryn sozǵan.
– Pandýstardyń yńǵaılylyǵyn múgedek jandar ǵana tap basyp tanıdy. Ǵımarattarǵa bizben keńespeı, pandýs salmaǵan durys. Biz «Ne stroıte dlıa nas, bez nas!» uranyn ustanamyz. Eger qalada paıdalanýǵa berilip jatqan ǵımarattardaǵy pandýstar múgedekterdiń qoǵamdyq uıymdary músheleriniń qatysýymen júzege asyrylsa, búginde mundaı másele oryn almas edi. Oblysta pandýs máselesi túpkilikti sheshildi dep aıta almaımyn. Máselen, qazir Aqtóbe qalalyq ákimdiginde, qaladaǵy kóptegen aýrýhana ǵımarattary aldynda pandýs joq. Áli zertteý kerek, bul baǵytta kóp jumys isteý qajet. Sebebi qazir qala ǵımarattarynda pandýstar talapqa saı salynbaıdy. Pandýstardyń kólbeýligi tym tik bolyp keledi. Tipti kóterilip kele jatqanda ustaıtyn ustaǵyshy da bolmaıdy. Sóıtip, ózi qolarbaǵa tańylǵan jandardyń qımyl-qozǵalysyna qıyndyq týady. Áıteýir, tıisti oryndardan sóz estimesek boldy dep kózaldaýshylyqqa barady, – deıdi Shahan.
«Pandýs-OK» jaýapkershiligi shekteýli seriktestiginiń dırektory Shahan Joldasbaevtyń aıtýynsha, qazir Aqtóbedegi 130-ǵa jýyq memlekettik mekemede ne pandýs joq, bolmasa talapqa saı kelmeıdi. Ol pandýstyń jobalaryn usynyp, tenderlerge qatysady. Múmkindigi shekteýli jandarǵa qajetti basqa jobalardy júzege asyrýdy qolǵa alýda. Búginde Shahandy aýdandaǵy taǵdyrlastarynyń jaıy da alańdatady. Pandýs máselesimen ol Hromtaý, Mártók aýdandarynda bolyp, ondaǵy memlekettik mekeme basshylarymen kezdesipti. О́z jobasyn tanystyrǵan..
Qazir ol basqaratyn seriktestikte 4 adam eńbek etedi. Osy eki jyldyń ishinde 8 ǵımaratqa pandýs ornatypty. Bıyl da tenderge qatysýda, jumys bolatyn shyǵar dep úmittenedi. Pandýs ornatýǵa qajetti qural-jabdyqtary jetkilikti. Qalalyq ákimdik ǵımaratyna pandýs ornatamyz ba dep úmittenip otyr.
Biz ony jigeri jasymaǵan jigit dep beker aıtyp otyrǵanymyz joq Ol 2011 jyldan beri sýda júzý sportynan múmkindigi shekteýli jandar arasyndaǵy el birinshilikterine udaıy qatysyp keledi. Bir jyldan keıin el birinshiliginde úshinshi oryn ıelendi. 2015 jyly sýda júzý sportynan úsh qashyqtyqta synǵa túsip, úsh birdeı altyn medalǵa ıe boldy, sýǵa júzýden sport sheberi. Ol 2015 jyly «oblystyń jyl adamy» atandy.
Zaıyby Lázzat Qarshyǵaqyzy da osy qoǵamdyq birlestikte eńbek etedi. Aıaýly anasy Bıbatpanyń, qaryndastary Gúlshahan jáne Shahıranyń bular degende jany bólek. Sondyqtan da bolar ózin qoǵamnyń tolyqqandy múshesindeı sezinip, jańa jobalardy júzege asyrýǵa talaby zor. Qoǵamdyq jumystardyń da bel ortasynda júredi.Tynymsyz eńbek pen únemi izdenis ony jańa ıdeıalarǵa jeteleıtinin sezingen saıyn ómirge degen qushtarlyǵy arta túsedi. Bul jigerli jigittiń ómirlik ustanymy, alǵa jetelegen aq qanat armany deý oryndy.
Satybaldy SÁÝIRBAI,
«Egemen Qazaqstan»
Aqtóbe oblysy