Ońtústik Qazaqstan oblysy Tólebı aýdanynyń Qaratóbe, Qasqasý, Qoǵaly, Alataý, Aqqum, Kemeqalǵan aýyldyq okrýgteri qymyz óndirisin damytýǵa ábden mamandanǵan, dep habarlaıdy aýdan ákimdiginiń baspasóz qyzmeti.
Qymyz óndirý boıynsha 2015 jyly 2375 bıe saýylsa, 2016 jyly 2415 bıege ósken. 2015 jyly 1781 tonna, 2016 jyly 1835 tonna qymyz óndirilgen. Onyń ishinde: 2015 jyly - 780 tonnasy óziniń qajettiligine jumsalsa, 1001 tonasy satylǵan. Al 2016 jyly - 783 tonnasy óz qajettiligine, 1052 tonnasy satylymǵa shyǵarylǵan. Qymyz óndirý salasynda memlekettik qoldaý sharalary 13 sharýashylyqqa kórsetilip, 480 tonna qymyz óndirgeni úshin 28,8 mln. teńge sýbsıdııaǵa qol jetkizdi. 2016 jyly qosymsha 3 sharýashylyq qosylyp, 16 sharýashylyqqa ulǵaıǵan. Bıyl sýbsıdııa kólemi 29,1 mln teńgege jetip otyr.
Aýdanǵa qarasty Aqqum aýyldyq okrýginde qymyz óndirýshi Ulbosyn Orazymbetova bıelerdi saýyp qana qoımaı, ony baptaýmen de ózi aınalysady. Salqyn bıe súti 2 saǵatta qymyzǵa aınalady eken. Ony keń dalanyń kermek ıisti kıikoty shóbine ystaıtynyn aıtady. Jeke kásipkerdiń aıtýynsha, 9 aıda 41640 lıtr qymyz óndiripti. Zertas aýyldyq okrýginiń turǵyny jeke kásipker Turar Kortaev 9 aıda 32500 lıtr qymyz óndirip, aýdan turǵyndaryn qymyzben qamtyp otyr.
Qymyz sapaly tamaq ónimi ǵana emes, sondaı aq shıpaly sýsyn dep te esepteledi. Halyq arasynda qymyzdy kóńil kúı sergektigi jáne uzaq jasaý sýsyny dep tekke atamaǵan. Emdik sýsyn retinde qymyzdy ózimizdiń ata-babalarymyz halyq medısınasynda paıdalanyp kelgen. Qymyz iship, aǵzalaryńyzǵa molyraq dárýmender jınap, densaýlyqtaryńyzdy jaqsartyp alýǵa bolady.