Qazaqstan birqatar sheteldik áýe jelilerimen EKSPO kezinde jańa reısterdi iske qosý týraly kelissózder júrgizýde. Bul týraly QR ınvestısııalar jáne damý vıse-mınıstri Berik Qamalıev vedomstvodaǵy baspasóz konferensııasy barysynda habarlady, dep jazady egemen.kz Premer-Mınıstrdiń resmı saıtyna silteme jasap.
«EKSPO sheńberinde QR Úkimetiniń qoldaýymen «ashyq aspan» júıesi boıynsha jumystar júrgizip jatyrmyz. Biz fın áýe jelisi sııaqty jańa áýe jelileri usha bastaıtyny týraly kelissózder júrgizip, kelisimge qol qoıdyq. Jaqynda biz polshalyq avıasııa basshylyǵymen kelissózder júrgizdik. Vengrııamen de kelisim bar, avstrııalyq, chehııalyq áýe jelilerimen reısterdi jańartyp jatyrmyz. Odan ózge, Qytaıdan Air China kompanııasy ushatyn bolady. 12 jeltoqsanda biz kezdesip, Air Astana jáne Scat áýe kompanııalary úshin qosymsha slottar suraımyz, osylaısha, Almatydan Sıan, Tegeran baǵyty boıynsha jańa halyqaralyq reısterdi ulǵaıtpaqpyz», - dep málimdedi B. Qamalıev.
Sondaı-aq, vıse-mınıstr Ońtústik-Shyǵys Azııadan, Qytaı men Koreıadan Astana men Almaty arqyly Eýropa, Parıj jáne Londonǵa áýe qatynastary boıynsha tranzıttiń damý úrdisin atap ótti.
Ult josparynyń 73-qadamyn iske asyrý aıasynda astananyń halyqaralyq qarjy ortalyqtarymen baılanysyn qamtamasyz etý boıynsha jumystar júrgizilip jatyr. Búgingi kúni Astanadan 5 halyqaralyq qarjy ortalyǵy: Frankfýrt, London, Dýbaı, Gonkong, Seýl baǵytyna tikeleı ushýlar oryndalýda. Sondaı-aq, Vena, Parıj, Abý-Dabı, Beıjiń, Ystambul, Úrimshi jáne basqa qalalarǵa tikeleı reıster júzege asyrylýda. 2018 jyly – Tokıomen, 2019 jyly – Sıngapýrmen, 2020 jyly Nıý-Iorkpen áýe qatynasyn ashý josparlanyp otyr», - dedi ol.