Petropavlda 2017 jylǵy Búkilálemdik qysqy Ýnıversıadaǵa arnalǵan is-shara bolyp ótti. Oǵan Rıo Olımpıadasyna qatysýshy, «Astana Pro Team» veloklýbynyń beldi múshesi, jerlesimiz Baqtııar Qojataev arnaıy keldi.
Alaýdy tutatý rásimi 25 qańtar kúni Astanadaǵy Zııatkerlik mektebinde Elbasy Nursultan Nazarbaevtyń qatysýymen ótetini belgili. Qyzyljar – alaý estafetasyn qabyldaıtyn alǵashqy óńir. 26 qańtar kúni alaý estafetasy eń birinshi bolyp Petropavl qalasyna keledi. Qazirgi tańda osyǵan oraı munda daıyndyq jumystary júrip jatyr. 60 azamat alaýdy óńirdiń 12 shaqyrymǵa sozylatyn eń kórikti jerlerimen alyp ótedi. Al baıraqty básekege oblystan 9 sportshy qatysyp, konkımen júgirýden jáne shańǵydan baqtaryn synaıtyn bolady.
Qaladaǵy qazaq mektep-gımnazııasynda birinshi ótken «Ýnıversıadaǵa deıin 100 kún» mádenı-sport jobasy aıasynda belgili sportshymen tańǵy boı sergitý jattyǵýyna júzden astam oqýshy qatysty.
– Mundaı sharalardyń sportty nasıhattaýda, balalar arasynda salamatty ómir saltyn qalyptastyrýda mańyzy zor. Elimiz qysqy Ýnıversıada qatysýshylaryn alǵash ret qabyldaıtyndyqtan, jan-jaqty ázirlik joǵary deńgeıde júrgizilýde. Qazaqstandyq sportshylardyń barynsha kóp júlde utyp alaryna senemin, – deıdi Qazaqstan ulttyq quramasynyń múshesi B.Qojataev.
Qysqy Ýnıversıadany qoldaý maqsatynda uıymdastyrylǵan aımaqtyq aksııa bes júzden astam bilim oshaqtarynda jalǵasty.
О́mir ESQALI,
«Egemen Qazaqstan»
PETROPAVL