Almaty qalasynyń ákimi Baýyrjan Baıbek M.Áýezov atyndaǵy Qazaq memlekettik akademııalyq drama teatrynyń «Syǵan serenadasy» spektakline kórermen bolyp kelip, teatr ujymyn qýanyshqa keneltip qaıtty. Sahnaǵa kóterilgen qala ákimi teatrdyń 90 jyldyq mereıtoıymen quttyqtaı kele, óner ujymyna sý jańa Hyundai mıkroavtobýsyn syıǵa tartty.
«Qazaq óneriniń qara shańyraǵy M.Áýezov atyndaǵy Qazaq memlekettik akademııalyq drama teatryn 90 jyldyq mereıtoıymen shyn júrekten quttyqtaımyn. О́z tarapymyzdan sizderdiń árbir bastamalaryńyzǵa qol ushyn berýden aıanbaımyz. Bıylǵy jyl mereıtoılarǵa toly boldy. Tek mereıtoılar leginiń ózi 20-ǵa jetti. Qurylǵaly beri kórermenge 465 qoıylym usynǵan teatr ár maýsymda 45 spektakl usynyp, ony 100 myńǵa jýyq ónersúıer qaýym tamashalady. 91-maýsymnan bastap óziniń ǵasyrlyq belesine bettegen ujymǵa shyǵarmashylyq tabys pen shabyttyń shyrqaýyn tileımin. О́ner ordasynyń bıylǵy mereıtoıyna oraı teatr ujymyna 12 oryndyq jańa Hyundai mıkroavtobýsyn syıǵa tartýdy uıǵardyq», dep qala ákimi kólik kiltin teatr dırektory Erlan Bilálovke tabystady.
Qaladaǵy ár túrli mekeme ujymymen, mektep, joǵary oqý oryndary stýdentterimen kezdesýge, gastroldik saparlarǵa jıi shyǵatyn teatr ártisterine kólik zárýligi burynnan seziletin. Qara shańyraq teatr elimizdegi eń úlken óner ordalarynyń birinen sanalsa da, talaı jyldan beri shyǵarmashylyq top alys-jaqyn eldi mekenderge gastroldik saparlarǵa shyqqanda kólik jaǵynan qınalyp kele jatqany ras. Bir oblystyń kóleminde kemi eki-úsh aýdandy aralap, kelesi kórshi oblysqa attanyp ketýine týra keletin kez jıi bolady. Sondaı ýaqytta akterlardyń júrip-turýyna yńǵaıly derbes kóliktiń qajettiligi tipti, baıqala túsetin.
Teatr ujymynyń kóp jylǵy tilegi men zárýligin eskerip, ónerge qoldaý tanytyp, qala turǵyndarynyń atynan kólik syılaǵan Baýyrjan Qydyrǵalıulynyń syılyǵyna ártister balasha qýandy. Teatr dırektory E.Bilálov talaı jylǵy muqtajdyqtyń orny tolyp, ońtaıly sheshimin tapqanyna ujym atynan alǵysyn bildirdi.
Aıgúl AHANBAIQYZY,
«Egemen Qazaqstan»
ALMATY