NewEnergy energetıka salasyndaǵy dúnıejúzilik startap baıqaýynyń jeńimpazdary marapattaldy. Sondaı-aq EKSPO-2017 halyqaralyq kórmesinde tanystyrylatyn balamaly energetıka jáne «jasyl» ekonomıka salasyndaǵy 30 úzdik startap-kompanııany tańdaldy. Bul týraly egemen.kz Premer-Mınıstrdiń resmı saıtyna silteme jasap habarlaıdy.
Tańdalǵan jobalardyń kóbisi Izraılge tıesili. EKSPO-2017-de energetıka salasyndaǵy óz ázirlemelerin Eco Wave Power, Farm Dog, GreenQ, HomeBiogas, Tevva Motors Ltd, Unleash the light kompanııalary usynady.
Jeńimpazdardyń qataryna joǵary tehnologııalyq energııa shoǵyrlandyrýshy júıelerdi shyǵaratyn qazaqstandyq Primus Power kompanııasy da kirdi. Sonymen qatar, jeńimpazdardyń qatarynda Ulybrıtanııanyń (Kelda Technology, DAJIE), Úndistannyń (Promethean Energy Pvt. Ltd., REConnect Energy Solutions Pvt. Ltd.), AQSh-tyń (Volta, Inficold Inc.), Avstralııanyń (Lightwork), Germanııanyń (Breeze), Ispanııanyń (ezzingSolar), Nıderlandynyń (Sympower), Polshanyń (Lerta), Reseıdiń (WiseSoil), Ýkraınanyń (Ecoisme) jáne ózge de elderdiń kompanııalary bar. Olardyń jalpy sany 20-dan asady.
Budan ózge, Qazaqstannyń (Smart Slip, Primus Power), Izraıldiń, AQSh pen Reseıdiń alty kompanııasy ınvestorlardyń qarjylyq qoldaýyna ıe boldy. Sonyń ishinde óz startapyn damytý úshin bıznes-menedjment kýrsynan ótýge sertıfıkat tabystaldy.
Eske sala keteıik, keshe Astanada Qazaqstannyń Energetıka mınıstrliginiń uıymdastyrýymen energetıka salasyndaǵy NewEnergy startap baıqaýy ótti. Oǵan 37 elden balamaly jáne jańǵyrtpaly energetıka, «jasyl» ekonomıka jáne smart-tehnologııalar salasyndaǵy ózderiniń biregeı jobalaryn usynǵan 100 startap-kompanııa qatysty.