Keshe Almaty jurtshylyǵy áıgili voleıbolshy, KSRO-nyń eńbek sińirgen sport sheberi, professor Jánibekhan Saýranbaevty aqtyq saparǵa shyǵaryp saldy. Qazaq sportynyń kógine 60-shy jyldardyń basynda kelgen dańqty sportshy jasy 77-ge qaraǵan shaǵynda ómirden ótti.
Jánibekhan Nyǵmetuly Saýranbaev 1940 jyly 5 mamyrda Almatyda týǵan. Ol 1961-1972 jyldary Almatynyń «Býrevestnıgi» sapynda óner kórsetip, 1969 jyly KSRO chempıony, 1968 jáne 1970 jyldary kúmis, 1971 jyly qola júldegeri boldy. Al 1967 jyly KSRO halyqtary Spartakıadasy men Odaq chempıonatynyń qola júldesin qatar aldy. Buǵan qosa, eki ret – 1970 jáne 1971 jyldary Eýropa chempıondary Kýbogyna qol jetkizdi. 1964 jyldan bes maýsym boıy KSRO quramasynda oınap, Eýropanyń (1965) chempıony jáne Álem kýbogynyń (1966) ıegeri atandy. 1961 jyly Ýnıversıadanyń chempıony boldy.
J.Saýranbaev 1972 jyly sporttyq mansabyn aıaqtaǵan soń Kýveıtte jattyqtyrýshy bolyp istep, komandasyn osy eldiń úsh dúrkin chempıony ataǵyna jetkizdi. Al Qazaqstannyń paralımpııalyq quramasyn birinshi ret álemdik arenaǵa shyǵardy.
Professor Jánibekhan Saýranbaev budan keıingi sanaly ómiriniń 40 jyldan astam ýaqytyn Almaty arhıtektýra-qurylys ınstıtýty men Qazaq ulttyq polıtehnıkalyq ınstıtýtynda jas urpaq tárbıeleýge arnady. Ol 1988 jyldan ómiriniń sońyna deıin ınstıtýtta deneshynyqtyrý kafedrasyn basqardy.
Jánibekhan Saýranbaevtyń ákesi Nyǵmet Saýranbaev qazaqtyń fılologııa salasyndaǵy tuńǵysh ǵylym doktory edi. Sondaı ulaǵatty adamnyń urpaǵy sportta da óziniń ónegeli ómirin, irgeli izderin qaldyrdy.
Jatqan jerińiz jaıly bolsyn, qazaq sportynyń aıtýly tulǵasy!
Egemenqazaqstandyqtar