Qazaqstan Premer-Mınıstriniń orynbasary, 28-shi Búkilálemdik qysqy Ýnıversıada-2017 Uıymdastyrý komıtetiniń tóraǵasy Imanǵalı Tasmaǵambetov aldaǵy Halyqaralyq stýdenttik saıystardyń ótkizilýine Almaty qalasy men Almaty oblysyndaǵy nysandardyń ázirligin tekserdi, dep habarlaıdy egemen.kz primeminister.kz - ke silteme jasap.
Kóshpeli keńes barysynda I. Tasmaǵambetov Almatydaǵy Medeý aýdanynda ornalasqan 3 myń oryndyq «Halyq Arena» sport keshenine, Ýnıversıada ótetin Atletıkalyq qalashyqqa, «Almaty Arena» muz aıdyny saraıyna, «Suńqar» HShTK, «Medeý» muz aıdynyna jáne «Shymbulaq» taý shańǵy kýrortyna bardy. Sonymen qatar, «Tabaǵan» sport-saýyqtyrý kesheni men «Alataý» shańǵy bıatlon kesheniniń daıyndyq barysymen tanysty.
Vıse-premer sporttyq saıystarǵa obektilerdiń daıyndyq qarqynyna kóńili tolatyndyǵyn bildirip, birqatar naqty tapsyrmalar berdi. I. Tasmaǵambetov is-sharany ótkizý jáne saıys qatysýshylaryn qabyldaý aıasynda qala ınfraqurylymynyń ázirligin qamtamasyz etý qajettigine toqtaldy. Sondaı-aq, Ýnıversıada qonaqtarynyń qaýipsiz jáne jaıly ornalasýyna barlyq jaǵdaıdy jasaý qajettigine basa nazar aýdardy.
«Ýnıversıadanyń bastalýyna az ǵana ýaqyt qaldy. Barlyq kezeńdegi jumystar joǵary deńgeıde júrip jatyr. Infraqurylym, qatysýshylardy jáne qonaqtardy qabyldaýǵa baılanysty uıymdastyrý máselelerine basa nazar aýdarý qajet. Sonymen qatar, qaýipsizdik, energetıkalyq jetkiliktilik pen kólik júktemesin qosa eseptegende, halyqaralyq is-sharanyń kedergisiz ótýin qamtamasyz etýge qalalyq qyzmetterdiń tolyq ázir bolýy óte mańyzdy. Eń bastysy, Almatyǵa aǵylatyn qonaqtardyń kóptigin jáne sportshylardyń, jattyqtyrýshylar shtaby men tilshilerdiń saıys ótetin orynǵa jáne qonaqjaılarǵa baryp-kelýin esepke alǵanda, bul qala turǵyndary úshin qolaısyzdyq týǵyzbaýy tıis», - dep atap ótti I. Tasmaǵambetov.