Shanhaı erkin saýda aımaǵynda Shanhaı qalasyn et, balyq jáne tamaq ónimderimen qamtamasyz etýshi «Lınhaı» korporasııasynyń iri ortalyǵy quryldy. Osy ortalyq aımaǵynda alǵash ret «Qazaqstan» saýda ortalyǵy ashyldy.
«Lınhaı» aýylsharýashylyq ónimderi ortalyǵynyń ashylýy saltanatynda Qazaqstan Respýblıkasynyń Bas konsýly Joshyhan Qyraýbaev qatysty. Jıynǵa Shanhaı qalasynyń jáne Qytaıdyń ońtústik óńirlerinen tamaq ónimin satýshy iri kompanııa basshylary, jergilikti Úkimet pen Bank ókilderi, sheteldik Bas konsýldar, logıstıkalyq kompanııa basshylary jınaldy. Is-shara barysynda Erkin saýda aımaǵy men «Lınhaı» saýda ortalyǵy basshylyǵy, Qazaqstan Bas konsýldyǵy arasynda qazaqstandyq taýarlardy qytaı naryǵyna shyǵarý týraly ózara túsinistik memorandýmy qabyldandy.
«Ekologııalyq taza et, sút, balyq ónimderin satyp alýǵa daıynbyz. Eki memleket arasynda kelisimshart qanshalyqty tez júzege assa, soǵurlym tez jumysty bastap ketemiz. Organıkalyq ónimderdiń dámin bir tatqan tutynýshylar úshin qazaqstandyq taǵamdar únemi suranysqa ıe. Sondyqtan, keleshekte biz ekonomıkalyq baılanysty odan ári tereńdete túspekpiz» - deıdi «Lınhaı» korporasııasynyń basshysy Chıan Bıngan.
Qazaqstannyń Qytaıdaǵy elshiliginiń qoldaýymen, Shanhaıdaǵy Qazaqstan Bas konsýldyǵynyń uıymdastyrýymen 2016 jyldyń mamyr aıynda Ivý qalasynda «Astaý» eksport-ımporttyq kompanııasy tirkelgen. Bul kompanııa qazaqstandyq «Sultan», «Korona», «Tas saı», «EFK», «Almaty maı zaýyty», «Rahat», «Qarjaý» ShQ» sııaqty kompanııalar men sharýashylyqtardan 46 túrli taýar ónimin Qytaı naryǵyna resmı kirgizýge bolatyn arnaıy ruqsat qaǵazyn aldy. «Astaý» kompanııasynyń qurylǵanyna az ýaqyt ótse de Shanhaı qalasynyń erkin saýda aımaǵynda «Lınhaı» aýylsharýashyq korporasııasy arasynda áriptestik ornady. Nátıjesinde, «Lınhaı» korporasııasy qazaqstandyq ónimderdi eń iri satyp alýshyǵa aınaldy.
Qazaqstan saýda ortalyǵynyń ashylýy otandyq tamaq óndirýshilerge kórshiles úlken naryqqa jol ashyp otyr. Búginniń ózinde Shanhaı qalasy men Chjeszıan, Szııansý provınsııasynda áriptestik qatynas jasaýda. Tek osy úsh óńirdiń turǵyn sanynyń ózi 200 mln. astam adamdy quraıdy. Bul - óz óndirisin damytyp, halyqaralyq deńgeıge shyǵamyn deýshiler úshin úlken múmkindik.